Əlaqə Arxiv
news Image
2012.04.27
12:02
| A A A
İsa Qəmbərin oğulları Xədicə İsmayılovanın istintaqında
Prokurorluq "Azadlıq" radiosunun Azərbaycan bölməsinin əməkdaşının məsələsi ilə bağlı məlumat yaydı

Bakı şəhər Prokurorluğu "Azadlıq" radiosunun Azərbaycan bölməsinin əməkdaşı Xədicə İsmayılovanın şəxsi həyatının toxunulmazlığının pozulması barədə ərizəsi əsasında başlanmış cinayət işi üzrə başlanılan istintaqın ləng və keyfiyyətsiz aparılması barədə yayılan məlumatlara aydınlıq gətirib. Lent.az-ın Baş Prokurorluğun saytına istinadən verdiyi məlumata görə, "Azadlıq" radiosunun Azərbaycan bölməsinin əməkdaşı İsmayılova Xədicə Rövşən qızı, nümayəndəsi-vəkil İsmayılov Adil Əlviz oğlu ilə birlikdə müxtəlif kütləvi informasiya vasitələrində X.İsmayılovanın şəxsi həyatının toxunulmazlığının pozulması barədə ərizəsi əsasında başlanmış cinayət işi üzrə Bakı şəhər prokurorluğunun İstintaq idarəsində guya istintaqın ləng və keyfiyyətsiz aparılması, müstəntiqin onun həyat tərzi ilə bağlı marağını təmin edərək hadisəni araşdırmaması, dindirilməsi ilə bağlı vəsatət qaldırsa da, müstəntiqlə görüşə bilməməsi və sair istintaqın faktiki vəziyyəti və gedişatı ilə bir araya sığmayan və həqiqəti əks etdirməyən bəyanatlar verməklə növbəti dəfə cinayət işinin istintaqı ətrafında ictimaiyyət arasında mənfi rəy yaratmağa cəhd edilib: "Göstərilənləri nəzərə alaraq Bakı şəhər prokurorluğu cinayət işinin istintaqı ilə əlaqədar ictimaiyyət arasında real və obyektiv rəy yaranması üçün bəzi məlumatları növbəti dəfə ictimaiyyətə çatdırılmasını zəruri hesab edib. Belə ki, Xədicə İsmayılovanın müraciəti əsasında Baş Prokurorluq tərəfindən 15 mart 2012-ci il tarixdə Cinayət Məcəlləsinin 156.1-ci maddəsi ilə başlanmış cinayət işinin istintaqı Bakı şəhər prokurorluğunun İstintaq idarəsinə tapşırılıb. İstintaqın ilk mərhələsində X.İsmayılova nümayəndəsi A.İsmayılovun iştirakı ilə dindirilərək zərərçəkmiş şəxs qismində tanınmış və ona müvafiq hüquq və vəzifələri izah olunub. Bundan sonra istintaq tərəfindən cinayətin izlərinin, sübut mənbəyi ola biləcək digər maddi obyektlərin aşkar edilməsi, iş üçün əhəmiyyətli olan digər halların müəyyən edilməsi məqsədilə ekspert, kriminalist, X.İsmayılova və onun nümayəndəsi və hal şahidlərinin iştirakı ilə hadisə yeri olan, onun kirayədə yaşamış olduğu Abdullayev Emin Paşa oğluna məxsus Bakı şəhəri, Yasamal rayonu, Cəfərov qardaşları küçəsi ev 30, 5 nömrəli mənzilə baxışlar keçirilib, hadisə yerindən müvafiq maddi sübutlar götürülüb, ekspertizalar təyin edilərək rəyi alınıb, iş üzrə zəruri sorğular və əməliyyat tapşırıqları verilib. İstintaqla müəyyən edilib ki, 2011-ci ilin may ayınadək Bakı şəhəri, Yasamal rayonu, Cəfərov qardaşları küçəsi ev 30, mənzil 5-də Abdullayev Emin Paşa oğlu yaşamış, sonradan isə X.İsmayılova, Emin Abdullayev tərəfindən ona verilmiş 24 avqust 2011-ci il tarixli etibarnamə əsasında 2011-ci ilin may ayından həmin ilin sentyabr ayına qədər qeyd olunan mənzildə kirayədə yaşamış, ondan sonra isə həmin mənzildə hər ay 250 manat pulun X.İsmayılovaya ödəmək şərti ilə 2011-ci ilin sentyabr ayından noyabr ayınadək onun tanışları Vəfa Cəfərova və həyat yoldaşı Azər Məmmədov, noyabr ayından 2012-ci ilin yanvar ayına qədər tanışı Vəfa Cəfərovanın xalası qızı Əliyeva Leyla Şadil qızı, fevral ayından mart ayına qədər isə Qəmbər İlkin İsa oğlu kirayədə yaşamışlar. Bundan başqa istintaqla müəyyən olunmuşdur ki, Moskva şəhərindən Valeriy Mərdanovun adından, içərisində X.İsmayılova ilə bağlı fotoşəkillər olan zərflər, sonuncunun qeydiyyatda olduğu Bakı şəhəri, Binəqədi rayonu, Azadlıq prospekti ev 196, 164 nömrəli mənzilə və "Yeni Musavat" qəzetinin redaksiyasına poçt vasitəsilə göndərilmişdir. İstintaq zamanı həmin zərflər götürülərək cinayət işinə əlavə edilmişdir. Xədicə İsmayılovanın əlavə şəxslərin şahid qismində dindirilmələri barədə 28 mart 2012-ci il tarixdə istintaqa daxil olmuş vəsatəti təmin olunaraq həmin şəxslər dindirilmişlər. Eyni zamanda istintaqın tam, obyektiv və hərtərəfli aparılmasının təmin olunması üçün X.İsmayılovanın kirayədə yaşadığı mənzildə hər hansı bir video-çəkiliş aparan qurğunun yerləşdirilməsi və digər xüsusatların müəyyənləşdirilməsi məqsədilə onun ailə üzvləri, bacısı Səbinə Rəhimova, qardaşı Məmmədağa İsmayılov, 2011-ci ilin may ayından həmin ilin sentyabr ayına qədər yaşadığı mənzilə müxtəlif məqsədlərlə gələn çoxsaylı şəxslər - Bakı Dövlət Universitetinin Hüquq fakültəsinin magistratura pilləsinin tələbəsi, əlaqədə olduğu İbadov Əli Akif oğlu, həmin mənzildə şəxsi xadiməçisi kimi işlətdiyi Zeynalova Zeynəb Əlfəddin qızı, Seçkilərin Monitorinqi və Demokratiyanın Tədrisi Qeyri Hökumət təşkilatında tərcüməçi işləyən Qəmbər İlkin İsa oğlu, tanışı Əliyeva Leyla Şadil qızı, BDU-nin Hüquq fakültəsində Dövlət və Hüquq nəzəriyyəsi və tarixi kafedrasında müəllim işləmiş, Respublikaçı Alternativ Vətəndaş Hərəkatı təşkilatının idarə heyətinin üzvlərindən biri olan, "Azərbaycan Lizing şirkəti" MMC-də hüquqşünas işləyən Qədirli Erkin Toğrul oğlu, Seçkilərin Monitorinqi və Demokratiyanın Tədrisi Qeyri Hökumət təşkilatında tərcüməçi işləyən Qəmbər Turqut İsa oğlu, 14 saylı Hüquq məsləhətxanasının vəkili Quliyev Elton Rasim oğlu, tərcüməçi işləyən Şirinov Rəşad Ramiz oğlu, "USAİD" ABŞ-nın Beynəlxalq İnkişaf Agenliyinin Azərbaycandakı missiyasında Layihə meneceri işləyən Qəhrəmanova Aytən Hikmət qızı, "Abt Associates" Beynəlxalq Qeyri Hökumət təşkilatında Layihə meneceri işləyən Ələsgərova Ayla Qorxmaz qızı, Avropa İttifaqının Azərbaycanda yerləşən daimi nümayəndəliyində təhsil məsələləri üzrə məsul şəxsi Bağırov Pərviz Rəşid oğlu, "BP" Şirkətinin Brend və Nüfuz üzrə məsul işçisi Hacızadə Adnan Hikmət oğlu və tərcüməçi Persiyani Pərvanə Əhməd qızı şahid qismində dindirilmişlər. Zəruri istintaq hərəkətlərinin aparılması ilə əlaqədar 13 aprel və 17 aprel 2012-ci il tarixlərində Xədicə İsmayılova istintaqa dəvət edilsə də, o, çağırışa gəlməmiş, yalnız 26 aprel tarixdə çağırışa gələrək ifadə verib. Cinayət işinin başlandığı müddətdən X.İsmayılovanın nümayəndəsi ilə birlikdə istintaqa dəvət edilməsindən əlavə o, nümayəndəsi ilə birlikdə 17 mart, 3 aprel, 14 aprel 2012-ci il tarixlərdə Bakı şəhər prokurorluğunun rəhbərliyi tərəfindən qəbul olunaraq onun müraciətləri dinlənilmiş və istintaqın tam, obyektiv və hərtərəfli aparılması məqsədilə istintaqa konkret göstərişlər verilib. Hazırda cinayət işi üzrə istintaq davam etdirilir".

Sizin Reklam Yeriniz