Azərbaycan idmançıları Qırğızıstanın Çolpon-Ata şəhərində keçirilən III Dünya Köçəri Oyunlarında iştirak ediblər. Komandamız bu yarışda 10 idman növündə mübarizə aparıb. Təmsilçilərimizin çıxışı, yarışların təşkili barədə məlumat almaq üçün nümayəndə heyətinin rəhbəri, Gənclər və İdman Nazirliyinin Kütləvi bədən tərbiyəsi və texniki idman növləri sektorunun müdiri Aydın Məmmədovla görüşdük.

- 2012-ci ildə Qırğızıstan hökuməti bu cür yarışın təşkil edilməsi təşəbbüsü ilə çıxış edib. Əvvəlcə turnirin iştirakçı ölkələrin idman nazirlikləri səviyyəsində keçirilməsi nəzərdə tutulmuşdu. 2013-cü il avqustun 16-da Qəbələdə ölkə prezidentlərinin iştirakı ilə keçirilən Türkdilli Dövlətlərin Əməkdaşlıq Şurasının  Zirvə toplantısında qərara alındı ki, Ümumdünya Köçəri Oyunları iki ildən bir təşkil edilsin. Yarışın proqramı hazırlandı. İştirakçı ölkələr idman növlərini təqdim etdilər. Beləliklə, geniş miqyaslı bir yarışın əsası qoyuldu.  Zaman keçdikcə iştirakçı ölkələrin sayı artmağa başladı. Məsələn, 2014-2016-cı illərdə Köçəri oyunlarında 30-40 ölkə mübarizə aparırdısa, bu il iştirakçı ölkələrin sayı 74-ə yüksəlmişdi.

- 2016-cı ildə atletlər 23 idman növündə mübarizə aparırdı. Azərbaycan  yarışda 52 nəfərlik nümayəndə heyəti ilə təmsil olunurdu. Yarış komandamız üçün uğurlu keçdi. İdmançılarımız vətənə 4 qızıl, 4 gümüş, 7 bürünc medalla döndülər.  40 ölkə arasında aparılan mübarizədə 15 medal əldə etmək pis nəticə deyil. Bu il də ümumi medal sayımız 15 oldu, ancaq kəmiyyət baxımından əvvəlki yarışı daha uğurlu hesab etmək olar. Növbəti yarışa çox ciddi yanaşacağıq. Hətta elə sabahdan 2020-ci ildəki yarış üçün hazırlıqlara başlayacağıq.

- III Ümumdünya Köçəri Oyunları senyabr ayının 2-8-də Qırğızıstanın Çolpon-Ata şəhərində keçirildi. Qeyd etdiyim kimi, yarışda iştirak etmək istəyən ölkələrin sırası genişlənməkdədir. Bu dəfə 74 ölkədən 1976 idmançı qalib adı uğrunda yarışırdı. Bu qədər idmançının mübarizəyə qoşulması Köçəri Oyunlarının nüfuzundan xəbər verir. Ölkəmiz bu yarışda 28 idmançı, 6 məşqçi ilə təmsil olunurdu. Oyunlarda ədaləti ölkəmizdən 3 hakim qoruyurdu. İdmançılar 37 idman növündə qələbə uğrunda yarışırdılar. Komandamız 10 idman növündə qüvvəsini sınadı. İdman növləri arasında milli güləş, pəhləvan güləşi, mas-restlinq, kəmər güləşi,qol güləşi , tekboro, milli oxatma,alış güləşi kimi növlər yer almışdı. Yeri gəlmişkən deyim ki, alış güləşi üzrə yarışlar proqrama dünya çempionatı kimi daxil edilmişdi. Turnirdə təmsilçilərimiz 1 qızıl, 6 gümüş, 8 bürünc medal əldə etdilər. Milli güləşdə 60 kq çəki dərəcəsində mübarizə aparan Cəlal Süleymanov ölkəmizə qızıl medal qazandırdı. Alış güləşi üzrə keçirilən yarışda isə Gözəl Zutova 75 kq çəkidə ikinci oldu. Əldə edilən nəticələri qənaətbəxş adlandırmaq olar. Bununla belə, daha yaxşı nəticə əldə edə biləcəyimizi düşünürəm. İştirakçı ölkələrin və idmançıların çoxluğu rəqabəti də artırıb. Təşkilatçılar bəzi idman növlərində çəki dərəcələrini azaltmışdılar. Məsələn, 2016-cı ildə milli güləşdə 5 çəki dərəcəsində yarışlar keçirilirdi. Bu dəfə isə bu növdə 3 çəki dərəcəsinə yer verilmişdi. Yeri gəlmişkən, qeyd edim ki, Qırğızıstanda yarışlardan başqa, “Etno” adlı tədbir də keçirildi. Burada milli adət-ənənələr, milli mətbəx, əl işləri nümayiş olunurdu. Hər bir ölkə özünün milli mədəniyyətini təqdim edirdi.