Son vaxtlar ölkəmizdə bir sıra iri ticarət mərkəzlərində, bazarlarda baş verən yanğın hadisələri bu məsələyə daha çox diqqət yönəldir. Belə ki, bir neçə müddət bundan əvvəl iri ticarət mərkəzləri olan "Binə" və "Sədərək", həmçinin Sumqayıtda ticarət mərkəzlərində yaşanan yanğın, eləcə də bu günlərdə Astara rayon mərkəzində bazarın yanması nəticəsində onlarla sahibkar maddi zərərə düşdü. Bütün bunlar həm də iri ticarət obyektlərinin yanğın təhlükəsizliyinin nə dərəcədə səmərəli  təmin olunması məsələsini gündəmə gətirir. 

"Əmlak Bazarı İştirakçıları" İctimai Birliyinin icraçı direktoru Ramil Osmanlı Movqe.az-a açıqlamasında Azərbaycanda yanğın təhlükəsizliyi ilə bağlı maarifləndirmə işlərinin lazımi qədər aparılmadığını, əhalinin məlumatsız olması səbəbindən baş verən yanğınların qısa müddətdə yayılmasının qarşısının alına bilmədiyini dedi: "Mən deməzdim ki, bizdə yanğın təhlükəsizliyi təmin olunmur. Hətta ən yüksək şəkildə təhlükəsizlik sistemi ilə təmin olunan obyektlərdə belə yanğın baş verə bilər. Sadəcə, söhbət ondan gedir ki, Azərbaycanda mövcud obyektlərin bir çoxunda  yanğın standartları mövcud tələblərə uyğun deyil. Elə mağazalar var ki, orda təhlükəsizliklə bağlı bütün tədbirlər görülüb. Amma düzgün istifadə edilmədiyinə görə bu cür hadisələr baş verəndə ən azından yanğınsöndürən maşınlar gələnə qədər ilkin tədbirləri görmək, onun digər ərazilərə keçməsinin qarşısını almaq mümkün olmur. Hesab edirəm ki, bu da bizim bu sahədə olan maarifsizliyimiz, məlumatsızlığımızla bağlıdır. Azərbaycanda yanğın təhlükəsizliyi ilə bağlı ciddi maarifləndirmə işlərinin aparılmasına ehtiyac var. Bir çox yerlərdə yanğın təhlükəsizliyinə qarşı siqnallar quraşdırsa da, obyekt sahibləri özləri obyektdə siqaret çəkir və ya elektrik çaydanından çıxan buxar siqnalizasiyanın işə düşməsinə səbəb olur. Belə hallara kifayət qədər çox rast gəlinir.  Bu baxımdan, hesab edirəm ki, biz təhlükəszilik tədbirlərini deyil, maarifləndirməni, ora nəzarət kimi tədbirləri artırıb gücləndirməliyik".  

Hələ obyektlər tikilərkən yanğından mühafizə tədbirlərinin görülməli olduğunu deyən MBA LTD şirkətinin rəhbəri  Nüsrət İbrahimov isə iri obyektlərdə baş verən yanğınların səbəbini belə izah etdi: "Hər şey ilk öncə tikintidən başlayır. Tikinti ərəfəsində bütün məqamlar nəzərə alınmalı, yanğından mühafizə tədbirləri görülməli, yanğına qarşı dözümlü olan tikinti materiallarından istifadə edilməlidir. Bütün bunlar hələ obyektlər tikilərkən nəzərə alınmalıdır. Bu, diqqət yetirilməli olan birinci məqamdır. İkincisi, bizdə tikililər həddindən artıq bir-birinə yaxın və sıx tikilir. Tikililər arasında ola biləcək məsafə haqqında müəyyən standart var. Bizdə birmənalı olaraq həmin göstəricilərə diqqət edilmir. Üçüncü məqam ondan ibarətdir ki, bizdə bəzən tikililər ya yüksək elektrikli naqillərin altında, ya da qaz xətlərinin üzərində salınır. Müvafiq icra orqanları bu hala göz yummamalı, xüsusi nəzarət etməlidir. Dördüncüsü isə, Azərbaycanda insanların yanğın təhlükəsizliyi haqda məlumatları çox azdır . İnsanlar bəzən açıq naqillərdən istifadə edirlər. Bir çox hallarda isə işıqlandırma sistemlərində istifadə olunan naqillər elektrikin gücünə uyğun gəlmir. Bütün bunlar texniki normalar adlandırılır. Bu normalar gözlənilmədiyindən, obyekt tikiləndən sonra onlar müvafiq normaları yoxlayan orqanlara bir çox hallarda təhvil verilmir. Nəticədə də qurulan elektrik naqilləri istifadə olunan gücə hesablanmadığından, sonda yanğına gətirib çıxarır".