Xalq artisti Səməd Səmədovun Kəlbəcəri Kaliforniya ilə
"səhv salması" sənət adamları arasında da birmənalı
qarşılanmayıb.
Movqe.az xəbər verir ki, Modern.az saytı bununla bağlı
sənətçilərin fikrini öyrənib.
Xalq artisti Ağaxan Abdullayevin məsələyə münasibəti qısa olub:
"Mən siyasətə qarışan adam deyiləm, sənətkaram".
Əməkdar artist Zöhrə Abdullayeva isə onun fikirlərini arzu olaraq
dəyərləndirib:
"Yəqin Səmədin arzusudur ki, Kəlbəcərdə olsun, torpaqlarımız geri
alınsın. Mən belə başa düşürəm. Allah onu arzusuna çatdırsın,
tezliklə Kəlbəcərdə istirahət eləsin".Z. Abdullayeva hesab edir ki,
Səməd Səmədov yetərincə məlumatlı adamdır: "O dünənin uşağı deyil
ki?! Sadəcə bu onun arzusu olub. Həqiqətən də Kəlbəcər dünyanın
dilbər guşələrindən biridir".
Tanınmış xanəndə, xalq artisti Mələkxanım Əyyubova isə bildirib
ki, xalq artisti fəxri adını daşıyan şəxs belə məsələlərdən
xəbərdar olmalıdıır:
"Əgər "xalq artisti" adını daşıyırıqsa, belə məsələləri bilmək
borcumuzdur. Mən o torpaqları qarış-qarış gəzmişəm. Kiminsə savadı
yoxdursa, ona mən cavabdeh deyiləm. Dövlət tədbirlərində,
qurultaylarda fikir vermirəm ki, kim oxuyur, kim oxumur. Himn
çalınanda özümdən asılı olmayaraq onu başdan ayağa oxuyuram".
Xanım sənətkar 18 il əvvəl baş vermiş oxşar hadisəni də xatırladıb:
"1995-ci ildə Məhəmməd Füzulinin 500 illik yubileyində iştirak
etmək üçün Kərbəlaya gedirdik. Avtobusun biri nazirliyin
nümayəndələri və tanınmış sənət adamları idi. Birdən soruşdular ki,
kim himni bilir? Heç kim bilmədi. Ayağa qalxıb himni hamıya bir-bir
yazdırdım. Oxudum da. Amma adlarını çəkmək istəmirəm. Bir avtobus
xalq artistləri idi. Elə şeylər var ki, mən də bilmirəm, amma
öyrənirəm. Belə şeyləri mütləq bilməliyik".
Tanınmış müğənni Könül Kərimova əvvəlcə bunu zarafat kimi qələmə verdi: "Bəlkə zarafat edib? Yox belə məsələ ilə zarafat eləmək olmaz. Bu, yaxşı hal deyil. Bunu bilməmək qeyri-mümkündür. Söz tapa bilmirəm. Qarabağ ən ağrılı yerimizdir. Bu məsələdə necə çaşmaq olar? Əgər zarafatdırsa, da yolverilməzdir. Qarabağ hamımızın ağrımızdır".