"Avropa İttifaqının Azərbaycanın ərazi bütövlüyü məsələsinə münasibətinin yaxın vaxtlarda dəyişəcəyinin şahidi olacağıq". 

Movqe.az APA-ya istinadən xəbər verir ki, bunu bu gün Brüsseldə "Separatizmin beynəlxalq sülhə və təhlükəsizliyə yaratdığı təhdidlər" mövzusunda beynəlxalq forumun "Avropada separatizm: səbəblər, nəticələr. Avropanın iqtisadi və siyasi gələcəyinə yaranan təhlükələr" adlı ikinci panel iclasında çıxış edən Azərbaycanın Avropa İttifaqı yanında nümayəndəliyinin rəhbəri, Azərbaycanın Belçika və Lüksemburqdakı səfiri Fuad İsgəndərov bildirib. 
 
F. İsgəndərov Avropa İttifaqı ilə Azərbaycan arasında sazişin imzalanmasının həlledici mərhələyə qədəm qoyduğunu söyləyib: "Əgər bir neçə il əvvəl Brüsseldə Azərbaycanın ərazi bütövlüyünə müəyyən qədər səhlənkar və soyuq münasibət göstərilirdisə, artıq çox şey dəyişib. Avropa İttifaqı indi birmənalı şəkildə başa düşür ki, separatizm onun özünə zərbə vura bilər və Kataloniya bunun bariz nümunəsidir".