BMT-nin Ətraf Mühit Proqramının icraçı direktoru İnger Andersendən Azərbaycan Respublikasının Prezidenti İlham Əliyevə təbrik məktubu gəlib.

Mövqe.az-ın məlumatına görə, təbrikdə deyilir:

"Zati-aliləri.

Milli bayramınız – Respublika Günü münasibətilə Sizə və Azərbaycan xalqına səmimi təbriklərimi çatdırmaq mənə qürur hissi verir.

Azərbaycanın ətraf mühiti qorumaq və gələcək nəsillər üçün davamlı irs yaratmaq istiqamətində son illərdə nəzərəçarpan nailiyyətlər əldə etməsi ilə bağlı aşağıdakı bəzi məqamları məmnunluqla qeyd edirəm:

- 2019-cu ilin noyabrında bir gündə 650 min ağacın əkilməsi kimi kampaniya iqlim dəyişikliyinə mənfi təsirlərin yumşaldılmasına nəzərəçarpan töhfə idi. Həmin il Azərbaycan deqradasiyaya uğramış və meşəsizləşdirilmiş yüz milyonlarla hektar sahələrin yenidən bərpası məqsədilə Bonn çağırışına qoşulub.

- Sovet dönəmindən qalmış, Bakı şəhəri ətrafında neftlə çirklənmiş ərazilərin təmizlənməsi Xəzər sahilinin böyük ərazilərində Bakının və şəhərətrafının milyonlarla sakini arasında daha sağlam və təhlükəsiz ətraf mühiti təbliğ etmək məqsədilə yeni inkişaf imkanlarını ərsəyə gətirmək üçün irəliyə atılan böyük addım idi.

- Bioloji müxtəlifliyi qorumaq və ekoturizmi təbliğ etmək məqsədilə Xəzər dənizi sahili zonasında nadir ətraf mühitin qorunduğu Qızılağacda bütün Xəzər regionunda ilk dəniz milli parkı salınıb.

Bundan əlavə, Azərbaycan tullantıların azaldılması, nadir dəniz ekosisteminin konservasiyası, çirklənmənin qarşısının alınması fəaliyyətlərində iştirak edərək, Tehran Konvensiyası ilə idarə olunan BMT-nin Ətraf Mühit Proqramının işinə töhfə olaraq Xəzərdə dəniz mühitinin qorunmasında əhəmiyyətli rol oynayır.

Zati-aliləri, bir daha fürsətdən istifadə edərək, bu önəmli bayram münasibətilə Sizi təbrik edir, Azərbaycan Respublikası ilə davamlı əməkdaşlığı səbirsizliklə gözləyirəm.

Ən dərin ehtiramımı qəbul etməyinizi xahiş edirəm".

X X X

Braziliya Senatının Birinci vitse-prezidenti, Braziliya-Azərbaycan parlamentlərarası dostluq qrupunun Senatdakı sədri Antonio Anastasiadan Azərbaycan Respublikasının Prezidenti İlham Əliyevə təbrik məktubu gəlib.

Trend-in məlumatına görə, təbrikdə deyilir:

"Zati-aliləri, cənab Prezident.

Qarşılıqlı dostluq və hörmət münasibətlərini inkişaf etdirdiyimiz Azərbaycanı milli bayramı münasibətilə təbrik etmək mənə qürur hissi verir.

1993-cü ildə diplomatik əlaqələrimiz qurulandan bəri biz strateji, coğrafi və geosiyasi baxımdan əlverişli məkanda yerləşən, mühüm üstünlüklərə malik, dünyəvi, müasir və stabil demokratiyaya nümunə olan, əhalisinin müxtəlifliyi ilə qürur duyduğu Azərbaycanla əlaqələri dərinləşdirmək imkanımız oldu. Bundan əlavə, bu, böyük iqtisadi və ticari potensialı nümayiş etdirir. Belə ki, Cənubi Qafqazın ümumi daxili məhsulunun yarıdan çoxu Azərbaycanın payına düşür.

2014-cü ildə diplomatiyanın başqa bir səmərəli formasını tətbiq etmək məqsədilə qanunvericilərin beynəlxalq səviyyədə parlament təşkilatlarında iştirak etmələrinin nəticəsi olaraq Braziliya-Azərbaycan parlamentlərarası dostluq qrupu yaradılıb.

Öz fəaliyyəti ilə siyasi və parlamentlərarası dialoq, rəsmi və işgüzar səfərlər vasitəsilə ölkələrimizə müsbət dinamika verən bu qrupa böyük qürur və məmnuniyyət hissi ilə Senatda rəhbərlik edirəm. Parlamentlərimiz tərəfindən mümkün investisiya sahələri müəyyənləşdirilib və inkişaf fəaliyyətlərinin gündəliyi hazırlanıb.

Azərbaycanın neft və qaz hasilatı diqqət mərkəzindədir. Azərbaycan tərəfindən qəbul edilən səmərəli model dövlət şirkətinin bütün müqavilələrdə iştirakını nəzərdə tutur ki, bu da yerli Suveren Fonda ölkə daxilində və Braziliya da daxil olmaqla xaricdə öz investisiyalarını şaxələndirməyə imkan verir.

Mədəniyyət sahəsinə gəlincə, parlamentlərarası əlaqələr bu sahədə də zənginlik tapır. Musiqidə, "Şərqin konservatoriyası" adı ilə tanınan Azərbaycanın məşhur bəstəkar Üzeyir Hacıbəyli tərəfindən bəstələnmiş, müsəlman dünyasında ilk opera olan Leyli və Məcnun operasından başlayaraq nümayiş etdirməyə çox şeyi var. Ədəbiyyatda, Mirzə Fətəli Axundzadə, Mirzə Ələkbər Sabir, Cəlil Məmmədquluzadə, Cəfər Cabbarlı, Firudin bəy Köçərli və Əhməd Cavad kimi görkəmli şəxsləri var. İncəsənət, memarlıq, teatr və kinematoqrafiyada da oxşar nailiyyətləri var.

Azərbaycan əhalisinin savadlılıq dərəcəsinin 100 faiz olduğunu nəzərə alsaq təhsil sahəsində, eləcə də futbolda böyük qarşılıqlı marağı və hər iki ölkənin nəhəng turist potensialını önə çəkməklə bu sahələrdə təcrübə mübadiləsi faydalı olar.

Bu il ölkənizdə səfərdə olarkən zəngin və gözəl Bakıya səfər etməkdən əlavə, mən demokratiyasının gücü, əhalisinin müasirliyi ilə ölkələrimiz arasında iqtisadi, sosial və mədəni əlaqələrin böyük imkanlarının şahidi oldum.

Cənab Prezident, Braziliyanın dostluğu və müxtəlif sahələrdə əməkdaşlığı gücləndirmək niyyətində olduğu Azərbaycan kimi gözəl ölkənin milli bayramı münasibətilə təbriklərimi qəbul etməyinizi xahiş edirəm".

X X X

Xorvatiya Respublikasının Prezidenti Zoran Milanoviçdən Azərbaycan Respublikasının Prezidenti İlham Əliyevə təbrik məktubu gəlib.

Trend-in məlumatına görə, təbrikdə deyilir:

"Hörmətli cənab Prezident.

Azərbaycan Respublikasının milli bayramı münasibətilə Xorvatiya Respublikasının vətəndaşları adından və şəxsən öz adımdan Sizə səmimi təbriklərimi çatdırmaqdan məmnunluq duyuram.

Xorvatiya Respublikası Azərbaycan Respublikası ilə dostluq və tərəfdaşlıq əlaqələrini yüksək dəyərləndirir. Bu il bizim dövlətlərimiz üçün çox mühüm ildir. Belə ki, bu il biz diplomatik münasibətlərimizin qurulmasının 25-ci ildönümünü qeyd edirik. Əminəm ki, səmimi münasibətlərimiz və əməkdaşlığımız gələcəkdə də ölkələrimiz arasında qarşılıqlı anlaşmanı və dostluq əlaqələrini gücləndirməkdə davam edəcək.

Hazırkı çətin vaxtda dünya dövlətləri COVID-19 pandemiyası ilə mübarizə aparır və təəssüf ki, bu virus ölkələrimizin heç birindən yan keçmədi.

Mən Sizə və dost Azərbaycan xalqına rifah və tərəqqi arzulayıram. Əminəm ki, biz birlikdə virusun yayılmasının qarşısını uğurla alacağıq və ən qısa zamanda vətəndaşlarımızın gündəlik həyatlarına qayıtmasını təmin edəcəyik.

Cənab Prezident, xahiş edirəm ən yüksək ehtiramımı qəbul edin".

X X X

Braziliya Milli Konqresinin Deputatlar Palatasında Braziliya-Azərbaycan parlamentlərarası dostluq qrupunun sədri, federal deputat Klaudio Kaxadodan Azərbaycan Respublikasının Prezidenti İlham Əliyevə təbrik məktubu gəlib.

Trend-in məlumatına görə, təbrikdə deyilir:

"Hörmətli cənab Prezident.

Mən Azərbaycan Respublikasını müstəqilliyinin 102-ci və Braziliyadakı diplomatik xidmətinin 101-ci ildönümü münasibətilə təbrik etmək istərdim.

Dünyanı bürümüş COVID-19 pandemiyası səbəbindən bu bayramı şəxsi iştirakımızla qeyd edə bilməməyimizdən təəssüflənirəm. Buna baxmayaraq, biz bu bayramda qəlbən və ruhən birlikdəyik.

Federal deputat və Braziliya-Azərbaycan parlamentlərarası dostluq qrupunun sədri kimi ölkənizin milli bayramı münasibətilə Sizi təbrik etməkdən böyük şərəf duyuram.

Azərbaycan Xalq Cümhuriyyəti müsəlman dünyasında demokratik və dünyəvi respublikanın yaradılması istiqamətində ilk uğurlu addım idi. Azərbaycan Respublikasının tarixində digər mühüm məqam odur ki, müsəlman dünyasında qadınlara ilk dəfə kişilərlə bərabər siyasi hüquqlar verilib. Ölkənizin tarixində daha bir əlamətdar hadisə müasir tipli ilk universitet kimi Bakı Dövlət Universitetinin yaradılması olub.

İqtisadi sahədə Azərbaycanı qlobal miqyasda neft və qaz hasil və ixrac edən, Avropanın enerji təhlükəsizliyinə töhfə verən ölkə kimi tanıyırıq.

Biz onu da xüsusi qeyd etməliyik ki, Azərbaycan beynəlxalq idman ictimaiyyətinin fəal üzvüdür. Azərbaycan Beynəlxalq Futbol Assosiasiyaları Federasiyasının (FIFA), Avropa Futbol Assosiasiyaları İttifaqının (UEFA), Beynəlxalq Atletika Federasiyaları Assosiasiyasının (IAAF), Avropa Atletika Assosiasiyasının (EAA), Beynəlxalq Olimpiya Komitəsi və digər idman təşkilatlarının tamhüquqlu üzvüdür.

Cənab Prezident, bu gözəl bayram münasibətilə Sizə bir daha təbriklərimi və xoş arzularımı çatdırıram. Ölkələrimiz arasında yaranmış bu cür dostluq münasibətlərinə görə Sizə təşəkkür edirəm. Xüsusi vurğulamaq istəyirəm ki, Braziliya-Azərbaycan parlamentlərarası dostluq qrupunun məqsədi ikitərəfli və çoxtərəfli əməkdaşlığı inkişaf etdirməkdir. Bizim əsas məqsədimiz parlamentlər arasında məlumat və təcrübə mübadiləsini həyata keçirmək, iki ölkənin siyasi, iqtisadi, sosial və mədəni sahələrdə əlaqələri ilə bağlı araşdırmalar aparmaq, həmçinin həmrəylik tellərini möhkəmləndirməkdir.

Sonda bir daha Sizi təbrik edir, dəyərli xalqınızın çətinliklərin öhdəsindən gəlmək üçün göstərdiyi şücaəti çox yüksək qiymətləndirirəm".

X X X

Latviya Respublikasının Prezidenti Egils Levitsdən Azərbaycan Respublikasının Prezidenti İlham Əliyevə təbrik məktubu gəlib.

Trend-in məlumatına görə, təbrikdə deyilir:

"Zati-aliləri.

Azərbaycanın milli bayramı – Respublika Günü münasibətilə Sizə ən səmimi təbriklərimi çatdırır, ölkənizə sülh və tərəqqi arzulayıram.

Latviya və Azərbaycan arasında bir çox mühüm sahələrdə gözəl əməkdaşlığın qurulmasını məmnunluqla qeyd edirəm. Ötən illər ərzində bizim dostluğumuz siyasi, iqtisadi, mədəni sahələrdə, eləcə də xalqlararası ünsiyyətdə səmərəli nəticələr verib.

Pandemiyanın yaratdığı hazırkı çağırışlar bizim gündəlik həyatımıza və işimizə təsir göstərib. Buna baxmayaraq, mən əminəm ki, ölkələrimiz arasındakı uğurlu əməkdaşlıq bizə bu böhrandan daha güclü şəkildə çıxmağa imkan verəcək.

Qəti əminliyimi bildirirəm ki, bizim qarşılıqlı anlaşma və etimad ruhunda gözəl əməkdaşlığımız xalqlarımızın mənafeyinə uyğun olaraq bundan sonra da davam edəcəkdir.

Zati-aliləri, Sizə cansağlığı, Azərbaycan xalqına firavanlıq arzulayıram.

Xahiş edirəm ən yüksək ehtiramımı qəbul edin".

X X X

Kambocanın Kralı Norodom Sihamonidən Azərbaycan Respublikasının Prezidenti İlham Əliyevə təbrik məktubu gəlib.

Trend-in məlumatına görə, təbrikdə deyilir:

"Cənab Prezident.

Azərbaycanın milli bayramı – Respublika Günü münasibətilə Sizə və xalqınıza səmimi təbriklərimi çatdırmaq istəyirəm.

Fürsətdən istifadə edərək, Sizə cansağlığı, ölkənizin vətəndaşlarına firavanlıq arzulayıram.

Əminəm ki, ölkələrimiz arasında mövcud olan səmimi münasibətlər xalqlarımızın mənafeyi naminə bundan sonra da möhkəmlənməkdə davam edəcəkdir".

X X X

Belçikalıların Kralı Filipdən Azərbaycan Respublikasının Prezidenti İlham Əliyevə təbrik məktubu gəlib.

Trend-in məlumatına görə, təbrikdə deyilir:

"Zati-aliləri.

Ölkənizin milli bayramı – Respublika Günü münasibətilə Sizə və Azərbaycan xalqına səmimi qəlbdən təbriklərimi çatdırıram.

Pandemiya ilə əlaqədar çətin vəziyyətin yarandığı bu günlərdə Sizə və xalqınıza rifah və firavanlıq arzulayıram".

X X X

Albaniya Respublikasının Prezidenti İlir Metadan Azərbaycan Respublikasının Prezidenti İlham Əliyevə təbrik məktubu gəlib.

Trend-in məlumatına görə, təbrikdə deyilir:

"Hörmətli сənab Prezident.

İcazə verin Azərbaycanın milli bayramı - Respublika Günü münasibətilə Sizə və dost xalqınıza Albaniya xalqı adından və şəxsən öz adımdan ən səmimi təbriklərimi çatdırım.

Fürsətdən istifadə edərək, ölkələrimiz və xalqlarımız arasında mövcud olan möhtəşəm dostluq münasibətlərinə ən dərin ehtiramımı bildirir, bu münasibətlərin dərinləşməsi və möhkəmlənməsinə verdiyiniz dəstəyə görə Sizə təşəkkürümü ifadə edirəm.

Enerji sahəsindəki çox sıx əməkdaşlığımız, xüsusilə də TAP layihəsinin həyata keçirilməsində əldə edilən böyük irəliləyiş ölkələrimiz arasında yeni əməkdaşlıq layihələri üçün geniş perspektivlər açmışdır.

Sizi əmin edirəm ki, ölkələrimiz arasındakı münasibətlərin bütün sahələrdə daha da gücləndirilməsində qətiyyətliyəm.

Bütün dünyanın, eləcə də bizim ölkələrimizin COVID-19 pandemiyası ilə üz-üzə qaldığı bir vaxtda arzu edirəm ki, hamımız birgə səylərlə, müdrikcəsinə bu vəziyyətin öhdəsindən gələk, tezliklə gündəlik normal həyata qayıdaq və hər birimiz üçün daha yaxşı gələcəyə sahib olaq.

Sizi tezliklə, ən uyğun zamanda Albaniyada görmək arzumu bir daha bildirirəm.

Zati-aliləri, Sizə cansağlığı, Azərbaycan xalqına firavanlıq diləyirəm.

Bir daha ən yüksək ehtiramımı qəbul etməyinizi xahiş edirəm".