Hökumətdə hesab edirlər ki, ölkə
iqtisadiyyatı inkişaf etdikcə ixrac potensialı artdıqca yeni ölçü
vahidlərinin müəyyənləşdirilməsinə ehtiyac yaranır. Xüsusilə də
Avropa məkanına inteqrasiya prosesi buna zərurəti artırır.
Mənbənin məlumatına görə, hazırlanan sənəddə geyim, qida, sənaye
istehsalı sahəsində yeni ölçü vahidlərinin tətbiqi nəzərdə tutulur.
Məsələn, Azərbaycanda tətbiq olunan geyim və çəki ölçüləri
vahidləri çox az arealda tanınır və tətbiq olunur. Bu ölçülər
əsasında Avropa bazarına çıxarılmış məhsullar öz yerini tapa bilmir
və bəzi ölkələr tərəfindən qəbul olunmur.
Azərbaycanda işlədilən metr, kilometr və s. kimi uzunluq ölçü
vahidlərinin mil, yard, düym kimi beynəlxalq ölçü vahidləri ilə
əvəzlənməsi də baxılacaq məsələlər arasında yer alır.
Parlamentlə birgə müzakirə olunan sənəddə başqa bir məqam isə bu
proses çərçivəsində hazırda Azərbaycanda istehsalda tətbiq edilən
keçmiş QOST standartlarından imtina olunmasıdır.
Məsələyə münasibət bildirən Milli Məclisin İqtisadi siyasət
komitəsinin sədri Ziyad Səmədzadə də ölçü və standartların
təkmilləşdirilməsi, beynəlxalq ölçü və standartlara keçidin
gündəmdə olduğunu söyləyib. Komitə sədrinin sözlərinə görə, bütün
bu məsələlər parlamentin payız sessiyasında müzakirəyə çıxarılması
planlaşdırılan "Ölçmələrin vəhdətinin təmin edilməsi haqqında"
qanunda öz əksini tapır: "Bu çox vacib qanundur. Bütün dünya
standartlara gedir. Texniki vasitələr, onların hazırlanması,
geyimlər, informasiya texnologiyaları hansısa standartlara cavab
verməlidir. Bu qanunda Azərbaycanda istifadə olunan ölçü
vasitələrinin hansıların dəyişdirilməsi öz əksini tapacaq".
Komitə sədri hesab edir ki, adıçəkilən qanun layihəsi dövlət və
özəl sektorda istehsal standartlarını dünya standartlarına
çatdırılmasını nəzərdə tutur. Z. Səmədzadə onu da əlavə edib ki,
yeni qanun qəbul olunandan sonra Azərbaycandakı QOST standartı
aradan qalxacaq.