Hindistanın Kerala Kənd Təsərrüfatı Universitetinin alimləri insan saçlarından ətraf mühit üçün zərərsiz maye gübrə hazırlayıblar.

Movqe.az-ın Trend-ə istinadən məlumatına görə, ilkin çöl tədqiqatları zamanı müsbət nəticələr əldə edilib. Xammal qismində yerli bərbərxanalardan əldə edilən saçlar yuyulduqdan sonra qızdırılaraq tünd substansiya vəziyyətinə çatdırılıb. Aparılan analizlər insan saçlarının azot, fosfor, kalium, kalsium, maqnezium və kükürdlə zəngin olduğunu göstərib.

Tədqiqatlar zamanı saçlardan hazırlanmış mayenin sintetik gübrələrlə müqayisədə bitkiləri daha tez inkişaf etdirdiyi məlum olub. Yeni gübrə növü kimyəvi gübrələrdən istifadəni azaldacaq, həmçinin Hindistanın sutəmizləyici sistemlərində ciddi problemlərə səbəb olan insan saçlarının utilizasiyasına imkan yaradacaq.