Səhiyyə Nazirliyinin statistikasına əsasən, Azərbaycanda il ərzində 100 min əhali arasında 200-300-ə yaxın insult halı qeydə alınır. Movqe.az-ın məlumatına görə, bunu Əziz Əliyev adına Həkimləri Təkmilləşdirmə İnstitutunun nevrologiya kafedrasının assistenti Rahim Əliyev deyib.
O qeyd edib ki, bunların 30 faizi ilk ay ərzində dünyasını dəyişir, digər 30 faiz əlil olur, digər şəxslərin isə yardıma ehtiyacı olur, qalan xəstələr əmək fəaliyyətini bərpa edə bilir.
Ötən illə müqayisədə insultla xəstələnmə göstəricisində artımın olduğunu deyən R.Əiyevin sözlərinə görə, ürək əməliyyatı edilən insanlar arasında da insulta rast gəlinmə faizi çox olur: "Eyni zamanda, əhali yaşlaşdıqca, insanların ömrü uzandıqca insult riski çoxalır. Proqnozlara görə, 20 il ərzində dünyada insult riski 30-35 faiz azaldılacaq. Amma eyni zamanda, əhalinin yaşlanması ilə bu risk 11 faiz artacaq. Müxtəlif yaş qruplarında insultun risk faktorları müxtəlifdir. Cavanlarda insultun risk faktorlarına anadangəlmə ürək qüsurları, irsi arteraial hipertenziya, qan xəstəlikləri, narkotiklərdən istifadə daxildir. Yaşlılarda isə bu faktorlara şəkərli diabet, arteraial hipertenziya və s. daxildir”.
Onun sözlərinə görə, gənclər arasında insultla xəstələnmə göstəricisi aşağıdır. Mütəxəssis bildirib ki, abortlar, kontraseptivlərdən, narkotiklərdən istifadə, zərərli vərdişlər, o cümlədən siqaretdən istifadə insult riskini artırır. İnsult keçirən qadın və kişilərdən hansının daha çox yaşaya biləcəyi onların risk amillərinin çox, yaxud az olmasından asılıdır. Kişilərdə risk amillərinin çox olması, zərərli vərdişlər, gərgin iş insultdan sonra onların reabilitasiyasına təsir göstərir. Beyin infarktı keçirən xəstələrdə beyin qansızması, yəni insult olan xəstələrə nisbətən yaşama riski yüksəkdir”.
R.Əliyev deyib ki, insult xəstələnmə, əlillik və ölümün baş verməsinə səbəb olan xəstəliklər arasında bütün dünyada III yerdədir: "İnkişaf etməkdə olan ölkələrə insibətən inkişaf etmiş ölkələrdə insulta rast gəlinir. Bunun səbəbi inkişaf etmiş ölkələrdə xəstəliyin qarşısının tez alınmasıdır".
Zülfiyyə QULUYEVA
