Sentyabrın 25-də Qusar rayonunda "Gömrük islahatları və modernləşdirmə" mövzusunda Dövlət Gömrük Komitəsinin kütləvi informasiya vasitələrinin nümayəndələri üçün təşkil etdiyi təlimə start verilib.
Movqe.az xəbər verir ki, təlimin açılış mərasimində Dövlət Gömrük Komitəsi sədrinin müavini, gömrük xidməti general-mayoru İqbal Babayev, Azərbaycan Respublikasının Prezidenti yanında Kütləvi İnformasiya Vasitələrinin İnkişafına Dövlət Dəstəyi Fondunun icraçı direktoru Vüqar Səfərli, "Yeni Azərbaycan" qəzetinin baş redaktoru, millət vəkili Hikmət Babaoğlu, Mətbuat Şurası sədrinin müavini Müşfiq Ələsgərli, "Bakı-Xəbər" qəzetinin baş redaktoru Aydın Quliyev, "Yeni Müsavat" media qrupunun rəhbəri Rauf Arifoğlu, "Bizim yol" qəzetinin baş redaktoru Bahəddin Həziyev, "İki sahil" qəzetinin baş redaktoru Vüqar Rəhimzadə və "Trend" informasiya agentliyi baş direktorunun müavini Arzu Nağıyev iştirak ediblər.
Dövlət Gömrük Komitəsi sədrinin müavini İqbal Babayev tədbirdə iştirak edən KİV rəhbərlərinə və jurnalistlərə təşəkkürünü bildirib və bunu gömrük işinin təşkilinin səmərəliliyinin artırılmasına göstərilən dəstək kimi qiymətləndirib.
Komitə sədrinin müavini vurğulayıb ki, Dövlət Gömrük Komitəsində və gömrük sistemində islahatlar qlobal şəkildə həyata keçirilir. İslahatların məqsədi çevik idarəetmə sistemi və beynəlxalq standartlara uyğun gömrük xidmətini formalaşdırmaq, komitənin strukturunu rotasiya prinsipi əsasında qurmaq, nəzarət mexanizmindən xidmət mexanizminə keçməkdir.
İ.Babayev diqqətə çatdırıb ki, hazırda dünya gömrüyünün inkişafı əsasən üç istiqamətdə - "gömrük-biznes", "gömrük-hökumət" və "gömrük-gömrük" əməkdaşlığı üzərində aparılır. Azərbaycan Gömrük Xidməti isə bunların sırasında daha birini - "gömrük-media" əməkdaşlığını da görmək istərdi.
Komitə sədrinin müavini onu da vurğulayıb ki, ölkədə aparılan bütün islahatların fonunda gömrük sahəsində islahatların və modernləşmənin ideoloqu Prezident İlham Əliyevdir və məqsəd ölkə vətəndaşlarının, biznes subyektlərinin məmnunluğunu təmin etmək, beynəlxalq ticarəti asan və sürətli şəkildə həyata keçirməkdir.
Gömrük sahəsində yeniliklərin, islahatların mahiyyətinin və fəlsəfəsinin ictimaiyyətə çatdırılmasında kütləvi informasiya vasitələrinin xüsusi rol oynadığını vurğulayan İ.Babayev, bu baxımdan, Dövlət Gömrük Komitəsinin media qurumları və ictimaiyyətlə əlaqələrə xüsusi önəm verdiyini bildirib və təlimin sonunda əldə olunan biliklər hesabına kütləvi informasiya vasitələrində gömrük sistemi ilə bağlı məlumatların daha dəqiq və dolğun olacağına əminliyini ifadə edib.
Azərbaycan Respublikasının Prezidenti yanında Kütləvi İnformasiya Vasitələrinin İnkişafına Dövlət Dəstəyi Fondunun icraçı direktoru Vüqar Səfərli media nümayəndələri və sahibkarlar üçün təşkil edilən analoji təlim və seminarların əhəmiyyətinə toxunub, komitənin kütləvi informasiya vasitələri və ictimaiyyətlə münasibətlərini yüksək qiymətləndirib.
"Yeni Azərbaycan" qəzetinin baş redaktoru, millət vəkili Hikmət Babaoğlu gömrük sahəsində ölkə iqtisadiyyatının, beynəlxalq ticarətin inkişafına münbit şərait yaradacaq islahatlar həyata keçirildiyini və islahatların səmərəliliyinin artırılması işində bu təlimdə əldə olunacaq biliklərin də xüsusi rol oynayacağını bildirib.
"İki sahil" qəzetinin baş redaktoru Vüqar Rəhimzadə təlimin yalnız jurnalistlər üçün deyil, eyni zamanda, ölkə ictimaiyyəti üçün xüsusi əhəmiyyət daşıdığını qeyd edib.
"Bakı-Xəbər" qəzetinin baş redaktoru Aydın Quliyev isə qeyd edib ki, vaxtilə media üçün qapalı qurumlardan biri olan Dövlət Gömrük Komitəsi hazırda tam şəffaf dövlət təsisatlarından birinə çevrilib və xüsusilə, media orqanları ilə qurulan əməkdaşlıq münasibətləri yüksək səviyyədədir.
"Yeni Müsavat" media qrupunun rəhbəri Rauf Arifoğlu son dövrdə media ilə işgüzar və səmərəli əməkdaşlıq münasibətlərini komitənin həyata keçirdiyi islahatların ən uğurlusu kimi qiymətləndirib və bu gün Dövlət Gömrük Komitəsi və onun fəaliyyəti ilə bağlı məlumatların çox asan şəkildə əldə olunduğunu bildirib.
"Bizim yol" qəzetinin baş redaktoru Bahəddin Həziyev təlimdə iştirak edən jurnalistlərin əldə etdikləri biliklərin onların gələcək karyeralarının formalaşmasında, gömrük orqanlarının fəaliyyətinin geniş ictimaiyyətə çatdırılmasında mühüm rol oynayacağını vurğulayıb.
"Trend" informasiya agentliyinin baş direktorunun müavini Arzu Nağıyev gömrük orqanlarının son dövrdəki səmərəli fəaliyyətindən, həyata keçirilən islahatların əhəmiyyətindən danışıb və gömrük-media münasibətlərinin səmərəli müstəvidə qurulmasında təlimin mühüm rol oynayacağını bildirib.
Mətbuat Şurası sədrinin müavini Müşfiq Ələsgərli gömrük orqanları tərəfindən aparılan islahatların həm vətəndaş, həm də jurnalist kimi media nümayəndələrinin həyatında mühüm rol oynadığını və islahatların uğurla nəticələnərək mühüm nailiyyətlər əldə ediləcəyinə ümidvar olduğunu deyib.
Daha sonra təlim başlayıb. Təlimdə 20-dən artıq media qurumunun nümayəndəsi iştirak edir.
Təlim zamanı Dövlət Gömrük Komitəsinin mütəxəssisləri tərəfindən gömrük orqanlarında aparılan islahatlar, onların mahiyyəti, gömrük nəzarəti, ticarətin asanlaşdırılması, informasiya texnologiyalarının tətbiqi, fiskal siyasət, gömrük hüquqpozmaları və digər mövzularda məlumatlar çatdırılacaq, eyni zamanda, təlim iştirakçıları əldə etdikləri bilikləri ərazidəki gömrük orqanlarında əyani şəkildə tətbiq edəcəklər.
Təlim 5 gün davam edəcək.
