Kanada Uruqvaydan sonra marixuananın istifadəsi və satışını qanuniləşdirən ikinci və ən böyük dövlət oldu.

Movqe.az milli.az-a istinadən bildirir ki, dünəndən etibarən Kanadanın 13 əyalətinin qanunlarına uyğun olaraq yaş həddi 18 və ya 19 olan hər kəs istər dövlət, istərsə də fərdi şəxslərə məxsus mağazalardan marixuana əldə edə biləcək.

Marixuananın tibbi məqsəqlə istifadəsi Kanadada 2001-ci ildən bəri qanunidir.

Çərşənbə günü Kanadanın bir neçə bölgəsində marixuanın satışını həyata keçirən mağazalar fəaliyyətə başlayıb. Yerli vaxtla saat 12-ni keçdikdən sonra yüzlərlə insan Seint Cons şəhərindəki satış məntəqələrinə axın edib.

95 illik qadağanı qaldırmaq hazırkı baş nazir Castin Trudonun seçki kampaniyasının əsas vədlərindən biri idi.

Hökumətin ümidlərinə baxmayaraq, qara bazarın bir gecədə yox olması gözlənilmir. Kanada mətbuatı Ədliyyə Nazirliyinə əsasən verdiyi məlumata görə, qara bazarın tamamilə aradan qaldırılması üçün dörd ilə yaxın vaxt tələb olunur.

Müxalifət partiyaları isə hökuməti marixuananın qanuniləşdirilməsinə tələsdiyini bildirib.

Son rəy sorğuları göstərir ki, kanadalıların 70 faizi marixuananın leqallaşdırılmasının tərəfdarıdır.