Movqe.az xəbər verir ki, 21 noyabr 2018-ci il tarixdə Masallı rayonu Tatyanoba kəndinə təbii qazın verilməsi münasibəti ilə açılış mərasimi olmuşdur.
Tədbiri giriş sözü ilə Masallı RİHB-nin Güllütəpə kənd inzibati ərazi dairəsi üzrə nümayəndəsi Əlövsət Muradov açmışdır.
Masallı rayon İcra Hakimiyyətinin Başçısı cənab Rafil Hüseynov Azərbaycan Respublikasının Prezidenti cənab İlham Əliyevin diqqət və qayğısı ilə ölkəmizin hər yerində olduğu kimi rayon ərazisində də geniş tikinti, abadlıq-quruculuq işlərindən, habelə ərazilərin gələcək inkişafından, sosial problemlərinin həllindən danışmışdır. O, diqqəti Azərbaycan Respublikasının Prezidenti cənab İlham Əliyevin 18 sentyabr 2018-ci il tarixdə Masallı rayonuna səfərinin yekunlarına və qarşıda duran vəzifələrə cəlb etmişdir.
Rayon rəhbəri son illərdə ölkəmizin sosial-iqtisadi inkişafı naminə dövlət səviyyəsində həyata keçirilən tədbirlərin icmalını vermiş, regionlara göstərilən diqqəti nəzərə çatdırmış, Masallıda görülən abadlıq-quruculuq işlərindən bəhs etmişdir.
Masallı Rayon İcra Hakimiyyətinin başçısı cənab Rafil Hüseynov geniş nitqində rayonda qaz çəkilişinin 97 faizə çatdırıldığını və gələn il 100 faiz olacağını qeyd etmişdir. Rayon rəhbəri bütün bu işlərə görə ölkə rəhbəri cənab İlham Əliyevə və Birinci vitse-prezident Mehriban Əliyevaya təşəkkür etmişdir.
Sakinlərdən Soltanağa Nəsirov, Aynurə Qədiməliyeva və başqaları çıxış edərək əraziyə təbii qaz verilməsinə görə Azərbaycan Respublikasının Prezidenti cənab İlham Əliyevə minnətdarlıqlarını bildirmişlər.
Tədbirdə “Azəriqaz” İstehsalat Birliyi Lənkəran Regional Qaz İstismar İdarəsinin rəisi Hüseyn Şirinov bildirmişdir ki, Tatyanoba kəndinin qazlaşdırılması üçün 17 min paqonometr müxtəlif diametrli borularla qaz xətləri çəkilmiş, hər bir evə fərdi qaz sayğacı quraşdırılmışdır. Kənddə 224 ailəyə təbii qaz verilmişdir.
Tədbirdə təbii qaz verilişinin rəmzi əlaməti olan məşəli alovlandırılmışdır. Qonaqların iştirakı ilə kənd sakini Soltanağa Nəsirovun evində qaz yandırılmışdır.
Əlihüseyn Şükürov.
