Yayın isti havasında insan temperaturunun artması qəribə və eyni zamanda da ən çox rast gəlinən bir haldır. Bəs görəsən insan temperaturunun yüksəlməsinə səbəb nədir? Bu suala Movqe.Az-a həkim-terapevt Nəcibə Axundzadə açıqlama verdi.
Həkimin sözlərinə görə, son günlər temperatur yüksəlməsi faktları tez-tez qeydə alınır.
"Temperatur yüksəlməsinin
səbəbləri müxtəlif olur. Temperaturun yüksəlməsi halına orqanizmə
ya infeksiya düşdükdə, ya mərkəzi sinir sisteminin cavab reksiyası
verdiyi təqdirdə rast gəlinir, əsas səbəb isə insan immunitetinin
zəifliyidir.
Bundan başqa isti havada çoxu kondisionerin altında oturur. İnsan
dərhal hiss etməsə də, ona bu zaman soyuq dəyir. İsti havada
tərləyib, sonradan kondisionerin altında, güclü hava axınının
təsirindən soyuqlayanlar da olur. Soyuqdəymə özünü dərhal deyil,
sonradan hərarətin yüksəlməsi ilə göstərir", - N.Axundzadə
dedi.
Nəcibə Axundzadənin sözlərinə görə, günvurmada temperaturun qalxmasına səbəb ola bilər:
"Günvurma, istivurma ilə əlaqədar
da temperatur qalxa bilər. Günvurma ilə istivurma fərqli haldır.
Günvurma halı birbaşa günəş şüalarının təsiri nəticəsində yaranır.
İnsan bağlı, temperaturu yüksək olan otaqda da istivurmaya məruz
qala bilər. Bu hal günvurmadan ağır olur və insan daha gec özünə
gəlir".
Həkim normal orqanizmdə temperaturun 36-37 dərəcəyə qədər olduğunu
vurğuladı. Ətraf mühitün temperaturu yüksək olduqda, orqanizm özünü
soyuda bilmir.
Mayeni gün ərzində az qəbul etdikdə, insan kök, yaxud həddən artıq
arıq olduqda, orqanizm hərarətini tənzimləyə bilmir və belə
insanlar istidə daha çox əziyyət çəkir.
Türkan Nadirqızı
Movqe.Az