Əlaqə Arxiv
news Image
2015.10.02
16:19
| A A A
Suraxanı rayonunda çağırışyaşlı gənclərin həqiqi hərbi xidmətə yolasalma mərasimi keçirilib

Azərbaycan Respublikasının Prezidenti cənab İlham Əliyevin müvafiq Sərəncamına uyğun olaraq, 2015-ci il oktyabrın 1-dən etibarən ölkəmizin hər yerində olduğu kimi, Suraxanı rayonunda da gənclərin həqiqi hərbi xidmətə çağırışı başlanmışdır.Səfərbərlik və Hərbi Xidmətə Çağırış üzrə Dövlət Xidmətinin Rayon İdarəsində toplaşan çağırışçı gənclər həkim komissiyasında tibbi müayinədən keçərək hərbi hissələrə yola salınırlar. 2 oktyabr 2015-ci il tarixdə Rayon İcra Hakimiyyətinin, Səfərbərlik və Hərbi Xidmətə Çağırış üzrə Dövlət Xidmətinin Suraxanı Rayon İdarəsinin, Rayon Gənclər və İdman İdarəsinin birgə təşkilatçılığı ilə Suraxanı rayonu Heydər Əliyev parkında çağırışyaşlı gənclərin hərbi xidmətə yola salınması münasibətilə tədbir təşkil olunmuşdur. Təntənəli yolasalma mərasiminin iştirakçıları əvvəlcə Azərbaycan xalqının Ümummilli Lideri Ulu Öndər Heydər Əliyevin parkda ucalan abidəsini ziyarət etdilər və önünə tər güllər qoydular, Suraxanı rayonu Heydər Əliyev Mərkəzi ilə tanış oldular.Səfərbərlik və Hərbi Xidmətə Çağırış üzrə Dövlət Xidmətinin Suraxanı rayon İdarə rəisinin müavini - Səfərbərlik Hazırlığı və Səfərbərlik şöbəsinin rəisi Qurban Şirinov çıxış edərək bildirmişdir ki, ölkəmizin ərazisinin 20 faizı təcavüzkar Ermənistan tərəfindən işğal olunmuşdur. İllər ötsə də, BMT-nin erməni işğalçı qüvvələrinin torpaqlarımızdan çıxarılmasını tələb edən 4 qətnaməsinə və digər nüfuzlu beynəlxalq təşkilatların qətnamələrinə təcavüzkar dövlət məhəl qoymur, buna görə də ədalət öz yerini tutmur. Bir həqiqət məlumdur ki, güc məsələlərin həllində əsas şərtdir. Buna görə də Azərbaycan öz iqtisadi qüdrətini və paralel olaraq müdafiə gücünü artırır və təkmilləşdirir. Azərbaycan Respublikasının Prezidenti cənab İlham Əliyevin rəhbərliyi altında Azərbaycanın müdafiə qüdrəti davamlı surətdə güclənir. Yalnız qüdrətli iqtisadiyyata malik dövlətin güclü ordusu və müasir hərbi sənayesi ola bilər. Ölkəmiz məhz bu yolla gedir.Təntənəli yolasalma mərasimində çıxış edən Suraxanı Rayon İcra Hakimiyyəti başçısının birinci müavini Rəşad Hacıyev hərbi xidmətə yola salınan gəncləri təbrik edərək dövlət müstəqilliyinin qorunmasında, eyni zamanda, gənclərin bir şəxsiyyət kimi formalaşmasında milli ordumuzun əhəmiyyətindən söz açmış, ölkəmizin təhlükəsizliyi və müdafiəsinin təminində Azərbaycan Ordusunun müstəsna rolundan danışmışdır. Rəşad Hacıyev əsası xalqımızın Ümummilli Lideri Heydər Əliyev tərəfindən qoyulan ordu quruculuğu siyasətinin hazırda Silahlı Qüvvələrin Ali Baş Komandanı, Azərbaycan Respublikasının Prezidenti cənab İlham Əliyevin rəhbərliyi altında uğurla davam etdirildiyini xüsusi vurğulamış, Azərbaycanın sabitlik və inkişafının qarantı cənab İlham Əliyevin ətrafında Vətəni qorumaq ideyası naminə sıx birləşməyi hər bir Azərbaycan gənci üçün həm vətəndaşlıq borcu, həm də bir mənəvi vəzifə kimi səciyyələndirmişdir. Daha sonra çıxış edən Fövqəladə Hallar Nazirliyi Akademiyasının rəisi Pənah Süleymanov, Rayon Veteranlar Şurası İdarə Heyətinin üzvü Müseyib Bağırov, Müharibə, Əmək və Silahlı Qüvvələr Veteranları Təşkilatının Suraxanı rayon Veteranları şurasının sədri Eldar Rüstəmov, YAP Suraxanı rayon təşkilatı aparatının rəhbəri Fərman Rəsulov, şəhid ailələri adından Nəsibə Əliyeva qeyd etmişlər ki, bu gün Azərbaycan Silahlı Qüvvələri mənfur düşməni hər an məhv etməyə qadir güclü maddi-texniki bazaya malikdir. Regionda ən güclü və yüksək hərbi hazırlıqlı peşəkar ordumuz istənilən döyüş tapşırığını yerinə yetirməyə qadirdir. Tədbirə qatılan Böyük Vətən və Qarabağ müharibələri veteranları, ağsaqqallar, valideynlər ordu quruculuğu sahəsində qazanılmış uğurlardan danışmış, gənclərə Vətənin keşiyində ayıq-sayıq dayanmağı, ölkəmizin ərazi bütövlüyünü möhkəm qorumağı, hərb işinin sirlərinə mükəmməl yiyələnməyi tövsiyə etmiş, Vətəni göz bəbəyi tək qorumağın müqəddəs və məsuliyyətli vəzifə olduğunu bildirərək gənclərə şərəflə xidmət etməyi arzulamışlar. Sonda çağırışçı gənclər Azərbaycan bayrağını öpərək, müqəddəs "Qurani-Kərim"in altından keçərək musiqi sədaları altında ruh yüksəkliyi ilə ordu sıralarına yola düşmüşlər.

Sizin Reklam Yeriniz