Lirik şeirləri, poemaları ilə ruhumuzu oxşayan, fəlsəfi məzmunlu əsərləri ilə milli dəyərlərimizin keşiyində duran Bəxtiyar Vahabzadə oxucularının qəlbində elə silinməz bir iz qoyub ki, cismən yanımızda olmasa da, ruhən həmişə bizimlədir - nəğməli dodaqlarda, sevgi dolu ürəklərdə, məhəbbət dolu baxışlarda yaşayır... Bu fikirlər Nizami rayonundakı 10 saylı orta məktəbdə xalq şairi Bəxtiyar Vahabzadənin yaradıcılığına həsr olunmuş tədbirdə səsləndi, 70-dən artıq şeir kitabının, 2 monoqrafiyanın, 11 elmi - publisitik kitabın, yüzlərlə məqalənin, eləcə də 20-dən artıq poemanın müəllifi olan Bəxtiyar Vahabzadənin yaradıcılığı "vərəqləndi". Millətini bütün varlığı ilə sevən, ana dilinə böyük önəm verən vətəndaş şairin şeirləri şagirdlərin ifasında səsləndi, sözlərinə bəstələnmiş nəğmələr oxundu. Poemalarından, pyeslərindən müəyyən hissələr göstərildi. "Gülüstan" poemasından Azərbaycanın İran və Rusiya arasında bölünməsini əks etdirən səhnə, "Şəhidlər" poemasından, "Axı biz neyləmişdik?" şeiri hamını kövrəltdi. Sonra şairin öz ifasında səslənən "Axı, dünya fırlanır" şeirinin videoklipi göstərildi. Şagirdlərdən tədbirin aparıcıları Əhməd Məmmədli və Günel Əlizadə, Bəxtiyar obrazını yaradan Xalid Musazadə, Cansu və Amin İsmayıllılarin çıxışı, Püstənin qavalla rəqsi maraqla qarşılandı. İbtidai sinif şagirdlərindən Hüseynin, Ömərin, Aslanın, 5-ci sinif şagirdi Leylanın, 6-ci sinif şagirdləri Əmrah, Məleykə, Pənahın, 8-ci sinif şagirdlərindən Gözəllə Qızqayıtın , 9-cu sinif şagirdlərindən Röya, Məlahət, Mehrubə və Gunelin ifasında səslənən şeirlər ,Fatimə və Valentinanın oxuduqları mahnılar alqışlarla qarşılandı. Tədbirdə qonaq kimi iştirak edən Bakı şəhəri üzrə Təhsil İdarəsinin Nizami rayonu üzrə məsləhətçisi Fərman Abdullayev, Gənc Vətənpərvərlər Birliyinin (GVB) sədri Muğan Əliyev, ali və orta məktəblərlə iş şöbəsinin müdür müavini Aysən Əliyeva, məktəbin məzunu aktyor Elvin Əhmədov və başqaları çıxış edərək Bəxtiyar şeirinin qüdrətindən söhbət açdılar və belə görüşlərin keçirilməsini şagirdlərin dünyagörüşünün formalaşmasında ,vətənpərvərlik hislərinin aşılanmasında böyük rol oynadığını diqqətə çatdırdılar. Şairin tələbəsi olmuş məktəbin Azərbaycan dili və ədəbiyyat müəllimi Familə Aslanlı öz müəllimi ilə bağlı xatirələrindən danışdı. Məktəbin direktoru Leyla Məmmədova belə poeziya gecələrinin keçirilməsini artıq bir silsilə təşkil etdiyini söylədi və sonda həm qonaqların, həm də məktəbin kollektivi adından tədbirin təkilatçılarına-Azərbaycan dili və ədəbiyyat müəllimi Rəfiqə Mirzəyevaya, müsiqi müəllimi Sevda Hacıyevaya, Nüşabə Sadıqovaya, Aidə Hüseynovaya minnətdarlığını bildirdi.