Əlaqə Arxiv
news Image
2016.10.06
12:59
| A A A
taxfree.az internet saytı istifadəyə verilib

Ölkəyə xarici turistlərin marağının artırılması, turizm sektorunda sürətli inkişafın davamlılığının təmin edilməsi və rəqabət qabiliyyətinin möhkəmləndirilməsi məqsədi ilə Azərbaycan Respublikasının Prezidentinin 12 iyul 2016-cı il tarixli Fərmanı ilə "Əcnəbilər və vətəndaşlığı olmayan şəxslər tərəfindən Azərbaycan Respublikasının ərazisində alınmış istehsal, yaxud kommersiya məqsədləri üçün nəzərdə tutulmayan mallara görə ödənilmiş əlavə dəyər vergisinin qaytarılması Qaydası" təsdiq edilib və həmin Fərmanın 4-cü bəndi ilə Vergilər Nazirliyinə "Tax Free" sisteminin tətbiqinə başlanması ilə bağlı müvafiq tapşırıqlar verilib.

Nazirliyin mətbuat xidmətindən Movqe.az-a verilən xəbərə görə, tapşırıqların icrasının təmin edilməsi məqsədi ilə Vergilər Nazirliyinin müvafiq əmri ilə "Tax Free" sisteminin bütün zəruri məlumatlarını özündə əks etdirən və domen adı "www.taxfree.az" olan internet saytı yaradılıb. www.taxfree.az saytına keçid Vergilər Nazirliyinin www.taxes.gov.az və www.e-taxes.gov.az internet saytlarında və sosial şəbəkələrdəki rəsmi səhifələrdə yerləşdirilib.

Azərbaycanda "Tax Free" sistemi haqqında bütün zəruri məlumatları özündə əks etdirən www.taxfree.az internet səhifəsi Azərbaycan, ingilis və rus dillərində fəaliyyət göstərir. Bu resurs vasitəsi ilə istifadəçilər ilk öncə Azərbaycan Respublikası haqqında, o cümlədən ölkəyə gəlmək istəyən əcnəbi vətəndaşlar onlara gərəkli olan bütün məlumatlarla (məsələn, elektron turist vizaları barədə) tanış olma imkanı əldə edə bilərlər.

Səhifədə "Tax Free" sisteminin Azərbaycandakı özəllikləri barədə, bu sistemi tənzimləyən qanunvericilik aktları, normativ sənədlər barədə hər üç dildə ətraflı məlumat almaq mümkündür. İstifadəçi rahatlığını təmin etmək üçün alıcı və satıcılara aid xüsusi bölmələr yaradılib. Belə ki, "Tax Free" sistemindən yararlanmaq istəyən alıcılar ƏDV-nin qaytarılması şamil olunmayan mallar, "Tax Free" stikeri olan mağazalarda malların satışının rəsmiləşdirilməsi, ƏDV-nin geri qaytarılması, habelə "Tax Free" sisteminə qoşulmuş ticarət obyektləri barədə məlumatlana bilərlər.

"Tax Free" sistemini öz ticarət obyektlərində tətbiq edən satıcılar isə bu sistemə qoşulmaq üçün zəruri olan tələblər, qeydiyyat və qeydiyyatın ləğv olunma prosesi, öz mağazalarında malların satışının rəsmiləşdirilməsi, habelə Vergilər Nazirliyinin İnternet vergi idarəsi portalındakı "Tax Free" bölməsindən istifadə təlimatı ilə tanış ola bilərlər.

Səhifədə həm də ölkə üzrə "Tax Free" sisteminə qoşulmuş bütün ticarət obyektləri barədə məlumatla (obyektin adı, yerləşmə ünvanı) ətraflı tanış olmaq mümkündür.

ƏDV-nin qaytarılması, o cümlədən ölkə ərazisindəki hava limanlarında "Tax Free" məntəqələri barədə ətraflı məlumatlar isə "TAX REFUND" bölməsində yer alır.

Bundan başqa səhifədə əks-əlaqə yaratmaq imkanları da təqdim olunur ki, bunlar Vergilər Nazirliyinin Çağrı Mərkəzi (195-1), Vergi ödəyicilərinə xidmət mərkəzləri barədə məlumatlar və nazirliyin rəsmi səhifəsindəki sual-cavab bölməsi vasitəsilə yaradılmış imkanları özündə cəmləşdirir.

Alıcıların rahatlığını təmin etmək üçün daha bir imkan – "Tax Free Kalkulyatoru" da hazırlanaraq istifadəyə verilib.

Qeyd edək ki, "taxfree.az" səhifəsindən başqa Azərbaycanda "Tax Free" sistemi barədə lazımlı məlumatları istifadəçilər həm "Facebook", həm də "Twitter" sosial şəbəkələrində yaradılmış rəsmi səhifələrdən də ala bilərlər.

Sizin Reklam Yeriniz