Peyvəndlərlə bağlı xəbər valideynlərə SMS-lə bildirilir
"Valideynlərə uşaqlarının növbəti profilkatik peyvəndlərinin adı və
vaxtı barədə məlumatları mobil telefon vasitəsilə öyrənmək üçün
imkan yaradılıb". Movqe.az-ın xəbərinə görə, bu məlumatı bu gün
Elmi-Tədqiqat Pediatriya İnstitutunda Avropa İmmunlaşdırma Həftəsi
çərçivəsində keçirilən konfransda Respublika Gigiyena və
Epidemiologiya Mərkəzinin direktor müavini Afaq Əliyeva verib. A.
Əliyeva bildirib ki, artıq valideynlər mobil telefon
vasitəsilə 9103 nömrəsinə PEYVEND sözünü və uşağın 12 rəqəmli
Unikal kodunu qısa mesajla göndərməklə peyvəndin adını və tarixini
SMS-lə əldə edə bilirlər: "Qısa müddət ərzində sistem növbəti
peyvənd barədə məlumatları abonentə göndərir. Əgər
immunoprofilaktika təqviminə görə peyvənd nəzərdə tutulmayıbsa
müvafiq məlumat verilir. Xidmətdən ölkədəki bütün mobil operator
istifadəçiləri yararlana bilərlər".