news Image
2013.07.11
13:09
| A A A
Akif Muradverdiyevin apellyasiya şikayəti təmin olunmayıb

Bakı Apellyasiya Məhkəməsində Milli Təhlükəsizlik Nazirliyi (MTN) tərəfindən həbs edilən Prezident Aparatının keçmiş işlər müdiri Akif Muradverdiyevin apellyasiya şikayətinə baxılıb.


Bu barədə APA-ya məlumat verən təqsirləndirilən şəxsin vəkili Fuad Ağayevin sözlərinə görə, prosesdə qərar elan olunub. Qərara əsasən apellyasiya şikayəti təmin olunmayıb.

 

Qeyd edək ki, bir müddət əvvəl A.Muradverdiyevin girov müqabilində azadlığa buraxılmasına dair vəsatətlə Səbail rayon Məhkəməsinə müraciət edilib. Məhkəmə vəsatəti təmin etmədiyindən, qərardan apellyasiya şikayəti verilib.

 

Muradverdiyev Akif Şəmsəddin oğlu 2013-cü il iyunun 20-də saat 09:25 dəqiqədə Heydər Əliyev Beynəlxalq Hava Limanından Rusiya Federasiyasına aparmaq məqsədilə külli miqdarda dəyəri olan Çar Rusiyasına aid qədim qızıl pul sikkələrini qaçaqmalçılıq yolu ilə, yəni Azərbaycan Respublikasının gömrük sərhədindən gizli yolla gömrük nəzarətindən keçirib. O, Bakı-Moskva aviareysi ilə Rusiyaya uçmaq üçün Azərbaycan Respublikasının gömrük sərhədindən gömrük nəzarətindən keçdikdən dərhal sonra Milli Təhlükəsizlik Nazirliyinin əməkdaşları tərəfindən saxlanılıb. Qanunvericiliklə müəyyən edilmiş qaydada hal şahidlərinin iştirakları ilə keçirilən baxış zamanı onun əlində olan çantasından külli miqdarda dəyəri olan - Çar Rusiyasına aid 40 ədəd qədim qızıl pul sikkələri aşkar edilərək götürülüb.

 

Faktla bağlı Milli Təhlükəsizlik Nazirliyi İstintaq Baş İdarəsi tərəfindən Azərbaycan Respublikası CM-nin 206.1-ci (qaçaqmalçılıq) maddəsi ilə cinayət işi başlanıb. Akif Muradverdiyev təqsirləndirilən şəxs qismində cəlb olunaraq məhkəmənin qərarı ilə barəsində həbs-qətimkan tədbiri seçilib.