Azərbaycanın radikal siyasi müxalifətinin 9 oktyabr prezident seçkilərinə hesabladığı yeni seçki taktikası iflasa uğradı.
Onun bir neçə ay əvvəl aparıcı müxalifət qüvvəsinə çevirmək
məqsədi ilə yaratdığı Milli Şura fəaliyyətə başlamamış iflic
vəziyyətinə düşdü.
Bunu hakim partiyadan olan millət vəkili Aydın Mirzəzadə dilə
gətirib.
Onun dediyinə görə, Milli Şura rəhbərlərinin buraxdığı strateji və
taktiki səhvlər seçkiqabağı bloku kabinetlərdən kənara çıxmağa
imkan vermədi.
Millət vəkili deyib ki, onun səmərəsiz olacağı əvvəldən də məlum
idi.
A.Mirzəzadənin bildirdiyinə görə, ənənəvi Müsavat, iki Xalq Cəbhəsi
partiyası və Rəsul Quliyev qrupuna azsaylı Eldar Namazov - Rüstəm
İbrahimbəyov qrupunun qoşulması heç də siyasi cəmiyyətdə güclü bir
siyasi blok yarada bilməzdi:
"Yeni blok rəhbərlərinin bir-birinə münasibətlərinin bu dövrə qədər
heç də isti olmadığı isə hər kəsə bəlli idi. Sosial bazası güclü
olan prezident İlham Əliyevə və Yeni Azərbaycan Partiyasına qarşı
mübarizənin asan olmayacağını başa düşən müxalif radikal
siyasətçilər, builki seçkilərdə taktikanı dəyişmək qərarına
gəldilər.
Qarşıdakı beş ildə Azərbaycanın problemlərinin həlli ilə bağlı
ciddi proqram hazırlamaq əvəzinə, onlar 2013-cü ildən sonrakı dövr
üçün fantosqamaqorik bir plan tutdular. Plan ilk gündən siyasi
analitiklərdə sadəcə, gülüş doğururdu. Real problemlər üzrə real
təkliflər irəli sürmək əvəzinə, hakimiyyət rəqibləri ortaya "hər
şeyi söküb, yenidən quracağıq" istəklərini ortaya qoydular.
Milli Şuranın nəzarətində olan qəzetlərdən kənara çıxa bilməyən
"post-2013 planı" gözlənildiyi kimi qısa müddətdən sonra tamam
yaddan çıxdı. Onların Rusiya və Azərbaycanın tanınmış
kinorejissoru, 75 yaşlı təqaüdçü Rüstəm İbrahimbəyovu vahid namizəd
elan etməsi isə radikal müxalifətin seçkiyə başlamamış uduzmasını
etiraf etməsi oldu".
Millət vəkili bildirib ki, siyasi təcrübəsiz İbrahimbəyov ilk
addımlardan böyük səhvlər buraxmağa başladı:
"Ötən əsrin 70-ci illərində Heydər Əliyevin dəstəyi ilə uğur
qazanan kinorejissorun, siyasi proseslərdən xəbərsiz olduğu üzə
çıxdı. Onun Dağlıq Qarabağı mübahisəli ərazi elan etməsi,
opponentlərinin ağzından vurulmasına çağırması isə hətta,
tərəfdarlarını da heyrətə saldı.
Ən əcaibi isə radikalların vahid namizədinin ikili vətəndaşlığının
olmasının üzə çıxması oldu. Onu həlletmə adı ilə Moskvadan kənara
çıxmayan İbrahimbəyov, ordusunu paytaxtdan idarə edən kabinet
generalına bənzədi. Ötən müddət ərzində radikal siyasi müxaliflərin
əsas mövzusu İbrahimbəyovun nə zaman Bakıya gəlib, vəzifəsi ilə
məşğul olacağı və onun nə zaman Rusiya vətəndaşlığından çıxması
qayğıları oldu.
Bu sürət və istəklə isə məsələnin hətta, yeni ildə də həll
edilməyəcəyi aydın görünürdü. Belə vəziyyətdə isə radikallar
vəziyyətdən çıxış yolunu blok adından yeni namizədin verilməsində
gördülər. Ancaq məlum oldu ki, millət adından şura yaradanların hər
biri vahid namizəd kimi ancaq özünü görür. Təcili iclaslar
çağırılaraq öz namizədlərinə tramplin hazırlamağa, situasiyanı öz
xeyirlərinə çevirməyə çalışdılar.
Hətta, İbrahimbəyov da tərəfdarlarına məktub yazaraq onları yeni
namizədlər üzərində düşünməyə çağırdı. Görünən isə odur ki, dağılan
ev təsirini bağışlayan Milli Şuranın qalıqları üzərində isə dünənki
müttəfiqlərin hər biri öz Milli Şurasını yaratmağa çalışır..."