Uçan bina ilə bağlı cinayət işi başlandı
Bakıda uçqun hadisəsi ilə bağlı başlanan cinayət işinin istintaqı
şəhər prokurorluğunda davam etdirilir. Baş Prokurorluğun mətbuat
xidmətinin rəhbəri Eldar Sultanov Trend-in sorğusuna cavab olaraq
bildirib ki, Bakının Nərimanov rayonunda sökülməkdə olan
beşmərtəbəli binanın uçması ilə bağlı başlanan cinayət işinin
istintaqı Nərimanov rayon prokurorluğundan alınaraq Bakı şəhər
prokurorluğunun İstintaq idarəsinə verilib. Qeyd edək ki, yanvarın
25-də Bakı şəhəri, Nərimanov rayonunda yaşayış olmayan, sökülməkdə
olan beşmərtəbəli bina uçub. Hadisə yerində əməliyyat şəraiti
qiymətləndirilərkən məlum olub ki, bina uçaraq yaxınlıqda olan
avtomobilin üzərinə tökülüb. Nəticədə 1992-ci il təvəllüdlü
Bayramlı Cavid Ədalət oğlu və 1988-ci il təvəllüdlü Ələkbərov
Asiman Salman oğlu vəfat ediblər. Faktla bağlı dərhal Nərimanov
rayon prokurorluğunda Cinayət Məcəlləsinin 222.3-cü (Tikinti, mədən
işlərinin və sair işlərin aparılmasının təhlükəsizlik qaydalarını
pozma; eyni əməllər ehtiyatsızlıqdan zərərçəkmiş şəxsin ölümünə və
ya digər ağır nəticələrə səbəb olduqda) maddəsi ilə cinayət işi
başlanıb.
İş üzrə zəruri ekspertizalar təyin olunub. İstintaq tədbirləri davam etdirilir