news Image
2014.03.03
16:45
| A A A
Səhlab Bağırov: "Qanunsuz aksiyanın keçirilməsinə imkan verilməyəcək"

Bakının "Sovetski" məhəlləsinin bir qrup sakini 173 saylı orta məktəbin qarşısına toplaşıb.  Movqe.az xəbər verir ki, sakinlər Yasamal Rayon İcra Hakimiyyətində "Sovetski" məhəlləsinin sakinlərinin yaratdığı 7 nəfərlik Təşkilat Komitəsinin üzvləri ilə görüşün yekunlarını gözləyirlər. Onlar görüşdə təklif olunan qiymətlərin onları razı salmayacağı təqdirdə aksiya keçirəcəklərini bildiriblər.  Hadisə yerinə polis qüvvələri cəlb olunub. Ərazidə olan Bakı şəhər Baş Polis İdarəsinin rəis müavini Səhlab Bağırov APA-nın əməkdaşına bildirib ki, Bakı Şəhər İcra Hakimiyyəti ilə razılaşdırılmamış istənilən qanunsuz aksiyanın keçirilməsinə imkan verilməyəcək. Hazırda Yasamal Rayon İcra Hakimiyyətində Bakının "Sovetski" məhəlləsinin sakinlərinin yaratdığı 7 nəfərlik Təşkilat Komitəsinin üzvləri ilə görüş başlayıb. Görüşdə baş nazirin müavini Abid Şərifov, Maliyyə Nazirliyi Dövlət Maliyyə Nəzarəti Xidmətinin rəisi Cavanşir Yusifov, Yasamal Rayon İcra Hakimiyyətinin başçısı İbrahim Mehdiyev və digər rəsmilər iştirak edirlər. Qeyd edək ki, Bakının "Sovetski" kimi tanınan ərazisinin bir qrup sakini evlərinin sökülməsi müqabilində onlara veriləcək kompensasiyanın miqdarından narazıdırlar. Sakinlərə hər kvadratmetr üçün 1500 manat təklif edilib, sakinlər isə 4 min manat verilməsini istəyirlər. Fevralın 18-də sakinlərlə baş nazirin müavini, Bakı Şəhər İcra Hakimiyyətinin başçısı Hacıbala Abutalıbov, Yasamal Rayon İcra Hakimiyyətinin başçısının görüşü keçirilib. Görüşdə Təşkilat Komitəsi tərəfindən hökumətə 9 təklif təqdim edilib. Sakinlərin təkliflərinə hökumət tərəfindən martın 3-də cavab veriləcəyi bildirilib.