Respublika Gigiyena Epidemiologiya Mərkəzi (GEM) Zığdakı duzlu göldə çimməyi qadağan edən göstəriş verib. Qeyd edək ki, Abşeronda duzlu göllərin sayı çox olsa da, əhali onların yalnız üçündən istifadə edir. Duzlu göllərin ətrafında və dibində yeraltı suların və bulaqların olması onlardan müalicə məqsədi üçün istifadə etmək imkanı yaradır. Zığdakı duzlu göldən də oynaq, radikulit, bel osteroxondrozu, əsəb sistemi, hətta bəzi dəri xəstəliklərinin müalicəsində istifadə edilirdi. Mərkəzin sanitar gigiyena məsələləri üzrə şöbə müdiri Ziyəddin Kazımov Movqe.az-a bildirib ki, yodlu-bromlu sular duzlu gölü qidalandırsa da, onlar antropogen təsirə məruz qaldığından istifadəyə yararlı sayılmır:"Duzlu göl müalicəvi əhəmiyyətli olduğundan onun suyundan analizlər götürülüb. Analizlərin nəticələrinin mənfi olması və ətrafdakı antisanitariya şəraiti bizi məcbur etdi ki, əhalinin bu göldə çimməsini qadağan edək".
Z.Kazımovun sözlərinə görə, bir neçə ildir ki, göldən istifadəyə qadağa qoyularaq nöqsanların aradan qaldırılması üçün təkliflər verilib. Hər hansı bir müsbət irəliləyiş olmadığından göldən istifadəyə qadağa qoyan qərar qəbul edilib.Şöbə müdiri bu barədə Suraxanı rayon İcra Hakimiyyətinə, əraziyə nəzarət edən bələdiyyəyə və rayon polis idarəsinə bilgi verildiyini söylədi. Bildirdi ki, ərazidən istifadə zamanı baş verə biləcək hər hansı hadisəyə həmin orqanlar məsuliyyət daşıyır.