Təhsil Nazirliyi mediaya xüsusi diqqət yetirəcək - Açıqlama
"Bu gün rəqəmsal, sürətli, xətli media bütün insanları, məişəti
əhatə edib. Belə olan təqdirdə yeni media ilə iş təcrübəsi necə
olmalıdır, media ilə iş qurmaq imkanlarını haradan axtarıb üzə
çıxarmalıyıq? Bu kimi suallara cavab tapmalıyıq. "Media və təhsil
dialoqu: yeni çağırışlar" mövzusunda keçirilən konfransda bu
məsələlər ətrafında müzakirələr aparılacaq". Movqe.az-ın
məlumatına görə, bunu jurnalistlərə açıqlamasında Təhsil
Nazirliyinin QHT və KİV-lə iş sektorunun müdiri Cəsarət Valehov
deyib. Onun sözlərinə görə, bütün universitetlərin mətbuat xidməti
rəhbərlərinin iştirak etdiyi belə konfranslar gələcəkdə Bakıda və
bölgələrdə də davam etdiriləcək. Cəsarət Valehov qeyd edib ki,
birgə müzakirələrlə problemlərin həll yolu tapılacaq: "Biz
istəyirik ki, təhsil və media dialoqu daha yaxşı səviyyəyə gəlib
çatsın. Mediada təhsillə bağlı yazılan yazıların mahiyyəti, məzmunu
daha mükəmməl olsun, media qurumlarının, Təhsil Nazirliyinə aid
olan universitetlərin media ilə məşğul olan təmsilçilər media ilə
təhsil dialoqundan ortaya çıxan mahiyyəti görə bilsinlər. Təhsil
ekspertlərinin iştirakı ilə buna güzgü tutmağa çalışacağıq. Dünya
çox ciddi dəyişir və buna uyğun olaraq təhsil-mediada da məzmun,
forma baxımından çox ciddi dəyişikliyə uğrayır". Cəsarət Valehov bu
ildən ali məktəblərin jurnalistika fakültəsinə qəbul olan
abituriyentlərin qabiliyyət imtahanlarından keçirilməsinə də
münasibət bildirib. O, deyib ki, həm təhsil işçisi, həm də
jurnalistika ilə məşğul olan şəxs olaraq qabiliyyət imtahanlarını
vacib hesab edib. Onun sözlərinə görə, mediaya, jurnalistikaya
gələn insan yazmağı, fikir yürütməyi bacarmalıdır: "Bundan əlavə,
o, fikirlərini həm obrazlı, həm də sözün birbaşa mənasında deməyi
bacarmalıdır. Bu baxımdan jurnalistika fakültəsinə qabiliyyət
imtahanlarının olmasını xüsusi təqdir edirəm".