Ali məktəblərə qəbul imtahanları ərəfəsi repetitorların ən çox qazanc əldə etdiyi vaxtdır. Düzdür, ilboyu müəllimlərin qazancı bu qeyri-leqal işdən çıxır. Amma bir-iki il əvvəldən fərdi müəllimliklə məşğul olmağa imkanı çatmayan 11-ci sinif şagirdlərinin əksəriyyəti imtahanqabağı repetitordan məsləhət alır. Bir sözlə, bu dəqiqə müəllimlərin baş qaşımağa vaxtı yoxdur. Müəllimlərin çoxu məktəbdəki əsas işini tələm-tələsik görüb, fərdi məşğul olduqları şagirdlərin yanına qaçır. İş o yerə gəlib çatıb ki, indi repetitorla hazırlaşmayan gənclərin ali məktəbə qəbul olunması çox çətinləşib. Bu durum ali məktəblərə qəbul zamanı repetitorluğun inkişaf etdiyi şəhərlərlə kəndlər arasında böyük fərqlərin meydana çıxmasına səbəb olub. Müasir Təhsil və Tədrisə Yardım Mərkəzinin nümayəndəsi Elmina Kazımzadə belə hesab edir ki, repetitorluq ölkədə sosial ədalətsizliyi dərinləşdirir:"Hamı bu bahalı xidmət növündən istifadə edə bilmir. Nəticədə isə ildən-ilə ali məktəblərə qəbul olunanlar arasında imkanlı ailələrdən olan uşaqların sayı artır".
E.Kazımzadənin sözlərinə görə, repetitorluq tədris proqramlarına zərbə vurur, korrupsiya yaradır və dövləti vergi ödəyicilərindən məhrum edir:"Repetitorluq məsələsi heç bir qanunda öz əksini tapmadağından, pulla fərdi dərs deyən müəllimlərin əksəriyyəti vergidən yayınır".
Qeyd edək ki, repetitorlar sahibkarlıq fəaliyyəti ilə məşğul olan fiziki şəxs kimi yaşadıqları rayonun vergi orqanında qeydiyyata düşməlidirlər. Məllimin repetitorluqdan əldə etdiyi qazancdan dövlətə vergi verməlidirlər. Vergilər Nazirliyindən bizə bildirdilər ki, mənzilini icarəyə verən şəxslər kimi repetitorluqla məşğul olan müəllimlərin də əksəriyyəti vergidən yayınır.