"Qurultayın gedişindəki pozuntuları İsa Qəmbərin nəzərinə
çatdırsam da, o dedi ki, bunları şişirmə".
APA-nın məlumatına görə, bunu Müsavat Divanının keçmiş üzvü Vurğun
Əyyub Müsavat başqanlığına keçirilən seçkilərin nəticələrinə
münasibət bildirərkən deyib.
V.Əyyubun sözlərinə görə, qurultay keçirilən gün müəyyən
narazılıqlar və qüsurlar olub. O, İsa Qəmbərdən narazılığını ifadə
edib: "Qurultayın başlanmasına yarım saat qalmış partiyanın
təşkilat şöbəsinin müdiri Zöhrab Məhərrəmli rayon təşkilatlarının
sədrlərinə təzyiq göstərib. Mən bu məsələ ilə bağlı elə həmin gün
İsa Qəmbərə məlumat verdim, o isə dedi ki, məsələni çox
şişirtməyin. Bizə məlumat gəlib ki, bəzi adamlara iki bülleten
verilib. Arif Hacılı 3 səslə yetərsayı keçib. Bu qüsurlar olmasa,
ikinci turun qaçılmaz olduğu görünmürmü? Arif Hacılı Təşkilat
Komitəsində dedi ki, qurultay zamanı heç bir siyahı ortalıqda
olmasın. Ancaq qurultay günü siyahı ortalığa çıxdı. Bunlar
ədalətsizlik deyilmi?"
O, Müsavat başqanı Arif Hacılının qardaşı Vaqif Hacıbəylini də
ittiham edib: "Mən heç vaxt ağlıma gətirməzdim ki, Müsavatda bu cür
tərbiyədən və əxlaqdan uzaq adamlar var. Mənə böhtan, iftira
atırlar. Arif Hacılının qardaşı, Əhrar Partiyasının sədri Vaqif
Hacıbəyli Müsavat Partiyasında "nadzor" olmaq fikrindədir. Mən
ünvanıma YAP-çılardan belə eşitmədiyim təhqiri bəzi müsavatçılardan
eşitdim. Arif Hacılını başqan seçilməsi münasibətilə ona görə
təbrik etməmişəm ki, bu pozuntular gözümün önündə baş verib.
Deyirlər ki, mən partiyanın işində iştirak etməmişəm, xaricdə
olmuşam. Mən balalarıma çörək qazanmaq üçün Qarsa getmişəm, özümə
villa tikdirməmişəm".
Xatırladaq ki, sentyabrın 27-də Müsavat Partiyasının VIII qurultayı
keçirilib. Qurultayda Arif Hacılı 228 səslə partiyanın başqanı
seçilib. Qubad İbadoğlu 200 isə səslə ikinci olub.