Adam vurmuş sürücü uzağa qaça bilmədi
25 Fevral 2013 17:58 (UTC+04:00)
Hüquq-mühafizə orqanlarının həyata keçirdiyi istintaq və
əməliyyat-axtarış tədbirləri nəticəsində Bakının Xətai rayonu
ərazisində ölümlə nəticələnmiş yol nəqliyyat hadisəsini törədərək
hadisə yerindən qaçan sürücü müəyyən edilərək istintaqa cəlb
olunub. Bu barədə Movqe.az-a Baş Prokurorluğun mətbuat xidmətindən
məlumat verilib.
Müəyyən olunub ki, fevralın 24-də saat 20:50 radələrində metronun
"Həzi Aslanov" stansiyası yaxınlığında naməlum avtomobilin sürücüsü
yol hərəkəti və nəqliyyat vasitələrinin istismarı qaydalarını kobud
surətdə pozub. Yolu keçən piyada, 1954-cü il təvəllüdlü Ruslan
Hüseyn oğlu Əliyevi vuraraq hadisə yerindən qaçıb. Ruslan Əliyev
aldığı xəsarətlərdən hadisə yerindəcə ölüb.
Aparılmış təxirəsalınmaz istintaq və əməliyyat-axtarış tədbirləri
nəticəsində həmin yol-nəqliyyat hadisəsinin "Ford Tranzit" markalı
"90-XX-672" dövlət qeydiyyat nişanlı avtomobilin sürücüsü, Bakı
şəhər sakini, 1981-ci il təvəllüdlü Vaqif Anatolyeviç Bakerov
tərəfindən törədildiyi müəyyən edilib.
Hazırda iş üzrə istintaq davam etdirilir. Cinayət işi ilə bağlı
Xətai Rayon Polis İdarəsinin istintaq şöbəsində Cinayət
Məcəlləsinin 263.2 (yol hərəkəti və nəqliyyat vasitələrinin
istismarı qaydalarını pozma) və 264-cü (yol nəqliyyat hadisəsi
yerindən qaçma) maddələri ilə cinayət işi başlanıb.
Cinayətin törədilməsində şübhəli bilinən V.Bakerov tutularaq
istintaqa cəlb olunub.