Azərbaycana tuşlanan erməni raketləri anındaca zərərsizləşdiriləcək
30 Noyabr 2011 13:58 (UTC+04:00)
ABŞ-ın paytaxtı Vaşinqtonda yerləşən IMINIT& Analyses hərbi
nəşri bu günlərdə maraqlı bir informasiya ilə çıxış edib. Onlar
peyk vasitəsilə erməni tərəfinin HHM Sistemi ilə bağlı çəkilmiş
fotoları təhlil edərək, erməni "SKAD" raketlərini Bakının neft
strukturlarına təhlükə kimi dəyərləndirib. Bundan başqa, tərəflərin
zirehli texnikasını təhlil edən nəşr Azərbaycanın 300-400,
Ermənistanın isə 160 tanka malik olduğunu, daha 300 zirehli
texnikanın Dağlıq Qarabağda yerləşdiyni bildirir. Bu sahədə nəşrin
təhlilinə əsasən balansın olduğu gözə çarpır.
Zirehli transportyorlar,yüngül tanklar və döyüş maşınları
Azərbaycanda daha çoxdur. Ölkəmizin hərbi üstünlüyü təkcə ordunun
sayı ilə deyil, müasir artileriya sistemində də üzə çıxır. Belə ki,
Rusiyadan "Dağlıq Qarabağı boşaltmağa qadir olan" "Smerç" sistemi
alınıb. Azərbaycan 180 ədəd D-30 və 34 ədəd D-20, Ermənistan isə 90
ədəd D-20 və 34 ədəd D-30 tipli top alıb. Həmçinin Azərbaycanın
Hərbi Hava Qüvvələri Dağlıq Qarabağdakı köhnəlmiş Hava Hücumundan
Müdafiə sistemini məhv etməyə qadirdir. Bizdə Miq-29 qırıcı
təyyarələri 30 ədəd, SU-24 bombardımançısı 8, SU-25 qırıcısı isə 30
ədəddir. Sözügedən nəşrin açıqlamasına görə isə, erməni "SKAD"
raketləri Bakının neft strukturlarını və neft kəmərini təhlükə
altına qoya bilər. Maraqlıdır, hərbi əməliyyatlar bərpa olunsa,
onlar bu risqə gedə bilərmi? Biz necə, onları zərərləşdirə
bilərikmi?
Hərbi ekspert Cəsur Sümərinli Ermənistanın müharibə başlayarsa,
belə bir niyyətə düşə biləcəyini istisna etmədi. Lakin eyni zamanda
bildirdi ki, Azərbaycan tərəfi də düşmənin bu niyyətini dəf etməyə
tam şəkildə qadirdir: "Bu məsələlər ciddi şəkildə araşdırılmalıdır.
Müharibə çox amansız prosesdir. Tərəflər qələbə əldə etmək üçün
maksimum addımlara gedə bilər. Ermənilərin "Skad" raketlərilə neft
mədənlərini vurması ehtimalının nə dərəcədə real olub-olmadığını
nəzərə almalıyıq. Bir sıra ekspertlər güman edir ki, Azərbaycanla
Ermənistan arasında sadəcə olaraq, Qarabağ və sərhədyanı bölgələri
əhatə edən lokal xarakterli müharibə ola bilər.
Amma onu da nəzərə alaq ki, hərbi əməliyyatın başlanması anında
onun genişlənməsi perspektivi daha çoxdur. Proses ölkənin digər
ərazilərinə də nüfuz edə bilər. Xüsusilə də, tərəflər bir-birini
sıradan çıxarmaq üçün paytaxtdakı starateji obyektləri, neft
kəmərlərini hədəfə almaq barədə düşünər. Hər bir ölkə müharibəyə
hazırlıq prosesində bu kimi məsələləri də nəzərə alır. Bu çox mühüm
prosesdir. Amma bir sıra proseslərlə bağlı olaraq, Ermənistan
tərəfi bu addıma getməyə də bilər. Azərbaycan tərəfi gözlənilən
müharibədə Ermənistanı sözügedən addımdan çəkindirə bilər. Bu da
əsasən Azərbayanın Hərbi Hava Qüvvələri və Hava Hücumundan Müdafiə
Qoşunlarının gücü ilə bağlı məsələdir. Bütün beynəlxalq
araşdırmalarda etiraf edilir ki, bu mənada ölkəmiz çox güclüdür.
Pilotsuz təyyalərə vasitəsilə məlumat əldə edilməsi və preventiv
zərbə endirilməsi sahəsində ölkəmizin imkanları daha genişdir.
Ehtimal edirəm ki, müharibə başlayarsa, Azərbaycan tərəfi bu
məsələni xüsusi diqqətə alacaq və Ermənistanın sözügedən
addımlarını zərərləşdirmək istiqamətində xüsusi addımlar atılacaq.
Düşünürəm ki, Azərbaycan tərəfi döyüş planlarında bu amilə üstünlük
verəcək. Ermənistan Azərbaycanın hərbi sahədə üstünlüyündən
çəkinərək müharibə başladıqda, həlledici zərbə vurmaq niyyətinə
düşə bilər. Azərbaycan tərəfi də sözsüz ki, ehtiyatlı olacaq və ilk
andaca mütləq şəkildə düşmənin əsas gücünün zərərsizləşdirilməsi
strategiyası ortaya qoyulacaq".