Prezident İlham Əliyev: "Azərbaycan üçün Gürcüstan qardaş dövlət və strateji tərəfdaş olmaqla yanaşı, həm də təbii müttəfiqdir"
28 Fevral 2013 07:48 (UTC+04:00)
AzərTAc xəbər verir ki, fevralın 27-də Prezident İlham
Əliyevin və xanımı Mehriban Əliyevanın adından ölkəmizdə rəsmi
səfərdə olan Gürcüstan Prezidenti Mixeil Saakaşvilinin və
xanımı Sandra Elizabet Rulofsun şərəfinə rəsmi ziyafət
verilmişdir.
Mərasimdə çıxış edən Prezident İlham Əliyev bildirdi ki, Gürcüstan Prezidentinin Azərbaycana
səfəri bir daha ölkələrimiz arasında həyata keçirilən qarşılıqlı
səfərlərin və görüşlərin davamlı xarakter aldığını göstərir.
Xalqlarımızın ortaq tarixə və mədəni dəyərlərə malik olduğunu deyən
dövlətimizin başçısı hazırda ölkələrimizin strateji tərəfdaşlığa
əsaslan əlaqələrinin uğurla davam etdiyini diqqətə çatdırdı. "Bu
gün Gürcüstan və Azərbaycan təkcə özünü doğrultmuş müstəqil
dövlətlər deyil, həm də dinamik inkişaf edən, öz seçimini qoruyan,
öz müstəqil inkişaf yolunu, həm regional, həm də qlobal xarakterli
məsələlərdə fəal iştirak edən dövlətlərdir", - deyən Prezident
İlham Əliyev müstəqilliyin ilk illərində ərazi bütövlüyünün
pozulması, separatizm halları ilə üzləşən ölkələrimizin beynəlxalq
təşkilatlar çərçivəsində bir-birinin mövqeyini yüksək səviyyədə
müdafiə etdiyini bildirdi.
İqtisadi sahədə əməkdaşlığın səmərəli olduğunu vurğulayan
dövlətimizin başçısı ölkələrimiz arasında həyata keçirilən iri
layihələrin əhəmiyyətindən danışaraq dedi:
- Ölkələrimizdə islahatların həyata keçirilməsində, yeniləşmədə,
iqtisadi inkişafda ümumi və oxşar cəhətlər çoxdur. Bizi region
çərçivəsindən kənara çıxan qlobal xarakterə malik layihələr də
birləşdirir. Gürcüstan və Azərbaycan qlobal xarakter daşıyan enerji
və nəqliyyat layihələrinin fəal iştirakçıları kimi qitənin enerji
və nəqliyyat təhlükəsizliyi məsələlərində mühüm rol oynayırlar.
Ölkələrimiz nə qədər yaxın olsalar, bu rol regionun ümumi
inkişafına bir o qədər müsbət təsir göstərəcəkdir. Regionda
təhlükəsizlik, sabitlik və əmin-amanlıq cəmiyyətlərin və ölkələrin
rifahından daha çox asılıdır. Bu cəhətdən bizim təşəbbüs
göstərdiyimiz və uğurla həyata keçirilən layihələr ölkələrimizin
həqiqətən müstəqil dövlətlər kimi möhkəmlənməsində mühüm rola
malikdir.
Prezident İlham Əliyev son illərdə Gürcüstanda həyata keçirilən
islahatların əhəmiyyətinə toxundu. Ölkələrimiz arasında tarix boyu
yaranıb formalaşan dostluq əlaqələrinin və səmərəli əməkdaşlığın
bundan sonra da davam edəcəyinə əminliyini ifadə edərək dedi:
- Azərbaycan üçün Gürcüstan qardaş dövlət və strateji tərəfdaş
olmaqla yanaşı, həm də təbii müttəfiqdir. Bunu başa düşmək üçün
xəritəyə baxmaq kifayətdir... Azərbaycan Gürcüstan üçün, həmçinin
iqtisadi, investisiya və enerji layihələri nöqteyi-nəzərindən də
böyük əhəmiyyət kəsb edir.
X X X
Çıxışına "Mənim üçün Bakıya hər səfər bayramdır" sözləri ilə
başlayan PrezidentMixeilSaakaşviliqeyd etdi ki, Azərbaycan ilə Gürcüstan ortaq
tarixi və dəyərləri olan ölkələrdir. Gürcüstan dövlətinin başçısı
bir neçə il öncə soyuq qış günlərində qazsız və elektriksiz qalan
ölkəsinə Azərbaycandan gələn dost yardımını xatırladı, bununla
bağlı qərarına görə bir daha Prezidentİlham
Əliyevə və Azərbaycan xalqına təşəkkür etdi. BMT
Təhlükəsizik Şurasının üzvü olan Azərbaycanın beynəlxalq aləmdə
böyük nüfuza malik olduğunu deyən Mixeil Saakaşvili bildirdi ki,
Azərbaycan-Gürcüstan dostluğu dünyada qonşuluq münasibətlərinə bir
nümunədir. Dövlət başçısı son illərdə Prezident İlham Əliyevin
rəhbərliyi altında ölkəmizin böyük inkişaf yolu keçdiyini də
diqqətə çatdıraraq dedi:
- Hətta böyük ehtiyatları olan heç bir ölkə Azərbaycanın elədikləri
ilə müqayisəyə gələ bilməz. Niyə? Çünki Azərbaycanın dəqiq kursu,
öz müstəqilliyinin dəqiq yolu, istiqaməti, aydın üfüqləri vardır.
Düşünürəm ki, tarixi şəxsiyyətlərsiz tarixi qərarlar ola bilməz.
Bunun ən gözəl nümunəsi də Azərbaycan dövlətidir.
Gürcüstan Prezidenti xalqımızın ümummilli lideri Heydər Əliyevin
Azərbaycan dövlətinin yaranıb formalaşmasındakı müstəsna
xidmətlərini xatırladı, dahi şəxsiyyətin layiqli davamçısı
Prezident İlham Əliyev tərəfindən bu gün ölkəmizdə həyata keçirilən
quruculuq və inkişaf proseslərinin önəmini vurğulayaraq
bildirdi:
- Fikrimcə, Azərbaycan Avrasiyanın mühüm dövlətlərindən və ən
tanınmış ölkələrindən biri olacaqdır. Bakı şəhəri bunu aşkar sübut
edir. Bakının nə qədər maraq doğurduğunu artıq hamı etiraf
edir...
Sonda Gürcüstan Prezidenti bir daha yüksək qonaqpərvərliyə görə
Prezident İlham Əliyevə təşəkkür etdi.
-----------------
27.02.2013
22:01
AzərTAc xəbər verir ki, fevralın 27-də geniş tərkibdə görüş başa
çatdıqdan sonra Azərbaycan Prezidentiİlham
Əliyevvə Gürcüstan PrezidentiMixeil
Saakaşvilimətbuata bəyanatlarla çıxış etmişlər.
Prezident İlham Əliyevin
bəyanatı
- Hörmətli cənab Prezident, hörmətli qonaqlar!
Mən bir daha sizi Azərbaycanda səmimiyyətlə salamlayıram,
Azərbaycana xoş gəlmisiniz. Biz Sizin səfərinizə çox böyük
əhəmiyyət veririk. Siz Azərbaycanın böyük dostusunuz. Biz Sizinlə
son 9 il ərzində dəfələrlə görüşmüşük – həm Gürcüstanda, həm
Azərbaycanda, həm də başqa ölkələrdə. Bugünkü görüş və Sizin rəsmi
səfəriniz əvvəlki görüşlərin məntiqi davamıdır.
Bu illər ərzində Gürcüstan-Azərbaycan əlaqələri böyük və uğurlu yol
keçmişdir. Bu əlaqələr çox möhkəm təməl üzərində qurulubdur. Bizim
xalqlarımız əsrlər boyu bir yerdə olmuşdur, bir-birinə arxa-dayaq
olmuşdur və biz müasir münasibətləri bu möhkəm tarixi zəmin
üzərində qururuq. Müstəqillik dövründə Gürcüstan və Azərbaycan
strateji müttəfiqlər səviyyəsinə çatmışlar. Bu gün bu müttəfiqlik
münasibətləri inkişaf edir və möhkəmlənir. Əminəm ki, bu əlaqələr
gələcək illərdə də inkişafı həm Gürcüstan, həm Azərbaycan üçün çox
böyük əhəmiyyət daşıyan amil olacaqdır.
Çünki bizim uğurlu inkişafımız yalnız birlikdə mümkün ola bilər. Bu
birliyi, əməkdaşlığı möhkəmləndirmək üçün son illər ərzində çox
böyük işlər görülmüşdür. Bu gün biz bu barədə Sizinlə fikir
mübadiləsi aparmışıq. Müxtəlif layihələr icra edilir. Energetika,
nəqliyyat sektorlarında layihələr həm bizim ölkələri gücləndirir,
xalqlarımızın rifah halının yaxşılaşdırılmasına xidmət göstərir,
eyni zamanda, bölgədə gedən proseslərə müsbət təsir göstərir.
Bölgədə sabitliyin, sülhün, əməkdaşlığın dərinləşməsi üçün bizim
bərabər icra etdiyimiz layihələr xüsusi məna daşıyır. Bu gün bizim
ölkələri və regionu, Avropa qitəsini bizim bərabər icra etdiyimiz
layihələrsiz təsəvvür etmək mümkün deyildir. Biz Sizinlə bərabər
enerji məsələlərinin həlli üçün çox böyük səylər göstərmişik, böyük
uğurlara nail olmuşuq. Neft-qaz kəmərlərinin çəkilişi və enerji
təhlükəsizliyi məsələlərinin həlli - bütün bunlar bizim birgə
səylərimiz nəticəsində mümkün olan məsələlərdir.
Hazırda biz yeni böyük layihənin icrası ilə məşğul olmağa
başlamışıq. Əminəm ki, TANAP layihəsi Azərbaycan, Gürcüstan,
Türkiyə, Avropa üçün yeni böyük imkanlar açacaqdır. Eyni zamanda,
nəqliyyat məsələlərinin həllində də böyük işlər görülmüşdür. Əminəm
ki, Bakı-Tbilisi-Qars dəmir yolu uğurla başa çatdırılacaq və həm
Gürcüstan, Azərbaycan üçün, həm də bölgə və dünya üçün böyük
əhəmiyyətə malik bir məsələ olacaqdır.
Beynəlxalq əməkdaşlığımız da artır. Biz bir-birimizi beynəlxalq
təşkilatlarda daim dəstəkləyirik. Xarici siyasət məsələləri ilə
bağlı daim müxtəlif səviyyələrdə məsləhətləşmələr aparılır və bu da
çox uğurlu təşəbbüsdür. Bu təşəbbüsün çox gözəl nəticələri vardır.
Onlar ondan ibarətdir ki, bütün beynəlxalq təşkilatlarda biz
bir-birimizi daim dəstəkləyirik və müdafiə edirik. Bu da ölkələr
arasındakı əlaqələrə çox müsbət təsir göstərir.
Bütün digər məsələlərlə bərabər, bu gün bir daha biz bu məsələləri
nəzərdən keçirdik. Görürük ki, Gürcüstan və Azərbaycan iki dost,
qardaş və tərəfdaş ölkələr kimi irəliyə uğurla gedirlər.
Gürcüstanda son illər ərzində Sizin rəhbərliyinizlə çox böyük işlər
və islahatlar aparılmışdır. Gürcüstan böyük dərəcədə inkişaf
etmişdir. Həm siyasi proseslər müsbət istiqamətdə gedir, həm də
infrastruktur layihələrinin icrası ilə bağlı Sizin çox böyük
uğurlarınız vardır. Tbilisi şəhəri gündən-günə gözəlləşir. Batumi
də, həmçinin gündən-günə gözəlləşir. Bu gün mənə göstərdiyiniz yeni
layihələrin fotoşəkilləri bir daha onu göstərir ki, nə qədər böyük
işlər görülmüşdür. Son illər ərzində Gürcüstanda müxtəlif
istiqamətlərdə aparılan islahatlar nəinki MDB məkanında, eyni
zamanda, digər bölgələrdə də öyrənilir və bu islahatların həyata
keçirilməsində Sizin xüsusi əməyiniz, zəhmətiniz olubdur. Bu
islahatlar Sizin təşəbbüsünüzlə irəliyə aparılıbdır. Əlbəttə ki, bu
islahatlar gələcəkdə Gürcüstanın inkişaf etmiş ölkəyə çevrilməsində
də öz rolunu oynayacaqdır.
Bir daha demək istəyirəm ki, son illər ərzində biz Sizinlə
dəfələrlə görüşmüşük və həmişə çox səmimi fikir mübadiləsi
aparılmışdır. Bu görüşlər zamanı qəbul edilmiş qərarlar nəticə
etibarilə həm Gürcüstanı, həm Azərbaycanı böyük dərəcədə
gücləndirmişdir. Əminəm ki, bu müsbət meyillər gələcək illərdə də
davam edəcək, iki dost və qardaş ölkə - Gürcüstan və Azərbaycan
həmişə olduğu kimi, bir yerdə olacaqlar və bir istiqamətdə inkişaf
edəcəklər və ölkə daxilində olan bütün prosesləri, bütün məsələləri
uğurla həll edəcəklər.
Bir daha xoş gəlmisiniz, bir daha bütün qonaqları səmimiyyətlə
salamlayıram.
Prezident Mixeil Saakaşvilinin
bəyanatı
- Çox təşəkkür edirəm cənab Prezident! Mənim üçün böyük şərəfdir
ki, yenidən Bakıya səfər edirəm. Gürcüstana dost ölkədə səfərdə
olmaq mənim üçün çox əhəmiyyətlidir. Cənab İlham Əliyev bu gün mənə
çox maraqlı söhbətlər etdi. Hesab edirəm ki, atasının layiqli
davamçısı olan Azərbaycan dövlətinin başçısı öz fəaliyyətini uğurla
həyata keçirir. Heydər Əliyev tərəfindən təməli qoyulmuş bu kurs
cənab Prezident İlham Əliyev tərəfindən uğurla davam etdirilir.
Məhz Sizin fəaliyyətiniz nəticəsində Azərbaycan dövlətçiliyi
gücləndirilmişdir. Bu isə ən başlıca amildir.
Bu gün Bakının inkişafı, ölkədə həyata keçirilən infrastruktur
layihələri, eyni zamanda, Azərbaycan xalqının rifahının artırılması
çox vacibdir. Çünki Azərbaycan həm regionda, həm qlobal müstəvidə
vacib bir dövlətdir və bir sıra strateji təşəbbüslərin müəllifidir.
İstər regionda, istər geniş Avrasiya məkanında müsbət ab-havanın
yaranmasında Azərbaycanın müstəsna xidmətləri vardır. Eyni zamanda,
Azərbaycan bizim müstəqilliyimizin, inkişafımızın təminatçısıdır və
hər birinizə öz təşəkkürümü bildirirəm, xüsusilə də cənab
Prezident, Sizə. Gürcüstanda həyata keçirilmiş islahatlar barədə
söylədikləriniz məni çox təsirləndirdi.
Biz öz səfərlərimizi çox gözəl xatırlayırıq, Bakının küçələrini
dəfələrlə gəzmişik. Bir sıra ideyalar və fikirlər məhz
Azərbaycandakı səfərlərimiz nəticəsində meydana gəlmişdir. Mən ümid
edirəm ki, bir gün bizim də ölkəmizdə Sizin inkişaf öz əksini
tapacaqdır. Təbii ki, bu rəqabətdə biz bir balaca zəif tərəf kimi
çıxış edirik. Amma mən yenə də ümid edirəm ki, inkişaf davam
etdiriləcəkdir.
Gürcüstanda hakimiyyətdə kimin olmasından asılı olmayaraq əminəm
ki, Azərbaycanın bizim ölkə ilə dostluğu davam edəcəkdir.
Gürcüstana Azərbaycandan yaxın olan dövlət tapmaq mümkün deyildir.
Bu, sadəcə bəyanat, sadəcə sözlər deyildir. Son 10 il ərzində
dünyada heç bir ölkə Gürcüstan üçün Azərbaycanın etdiyini
etməmişdir, bizə bu qədər dəstək verməmişdir. Bizim çoxsaylı
tərəfdaşlarımız, dostlarımız vardır. Ancaq heç bir ölkə Gürcüstana
Azərbaycan qədər yardım etməmişdir. Bu isə, cənab Prezident,
bilavasitə Sizin xidmətinizdir. Mən çox şadam ki, Gürcüstanın da
Baş naziri Azərbaycana səfər etmişdir və öz gözü ilə buradakı
inkişafın şahidi olmuşdur. Bu da bizə imkan verir ki, bu dostluq
bundan sonra da davam etsin.
İnqilabi layihə olan Bakı-Tbilisi-Qars layihəsinin də başa
çatdırılması çox vacibdir. Mən ümid edirəm ki, ilin sonunadək bu
layihə başa çatdırılacaqdır. Bu, hər iki ölkə üçün tarixi bir
şansdır, bizim Avropaya açılan qapımızdır, Avropa qitəsinə
çıxışımızdır. Ona görə də mən ümid edirəm ki, bu layihənin həyata
keçirilməsinə istənilən maneələrin törədilməsi bizim milli
maraqlarımıza ziddir. Bu, bir fəlakət ola bilər. Ona görə də bu
layihənin sual altına alınması bir cinayətdir.
Ona görə mən hesab edirəm ki, bu layihənin heç bir alternativi
yoxdur. Bunun əksi bizim milli maraqlarımıza xəyanət ola bilər. Ona
görə də mən şübhə etmirəm ki, bu layihə bizim Avropaya, NATO-ya
istiqamətlənmiş yolumuzdur və bu layihə sıx əməkdaşlıq şəraitində
başa çatdırılacaqdır. Eyni zamanda, bizim tərəfdaşımıza və dostumuz
olan Türkiyə də burada mühüm rol oynayır. Mən şübhə etmirəm ki, bu
layihənin icrası başa çatdırılacaqdır.
Bu gün Gürcüstanın iqtisadi təhlükəsizliyi Azərbaycan tərəfindən
təmin edilmişdir. Bu soyuq qış aylarında Azərbaycanın fədakarlığı
bizi xilas etmişdir və bu, gürcü millətinin, Gürcüstan
dövlətçiliyinin bir növ xilas edilməsi olmuşdur. Bir daha
vurğulamaq istərdim ki, Gürcüstanın ərazi bütövlüyü də Azərbaycan
qədər heç bir ölkə tərəfindən dəstəklənməmişdir. Ərazi bütövlüyü
məsələsi çox mühüm bir məsələdir. Bütün Qafqaz haqqında danışanda
ərazi bütövlüyü fundamental prinsipdir və bu, başlıca əhəmiyyət
daşımalıdır. Bizim bu istiqamətdə siyasətimiz aydındır.
Neft və qaz kəmərləri sayəsində Gürcüstanın strateji, iqtisadi
əhəmiyyəti vardır və bir daha onu vurğulamaq istəyirəm ki, bu,
bilavasitə Azərbaycanın sayəsində baş tutmuşdur.
Təbii ki, hazırda Gürcüstanda siyasi vəziyyət mürəkkəbdir. Lakin
bir daha qeyd etmək istəyirəm ki, heç bir amil Gürcüstan-Azərbaycan
dostluğuna mane ola bilməz. Bir daha vurğulamaq istəyirəm ki,
Azərbaycansız Gürcüstanın gələcəyi, Gürcüstan dövlətçiliyinin
inkişafı mümkün deyildir. Bunu bir daha xüsusi vurğulamaq
istəyirəm.
Məhz keçmişdə müstəqilliyimizi o səbəbdən itirmişdik ki, biz
yaxından əməkdaşlıq edə bilməmişdik. Lakin son illərdə biz
dostluğumuzu o qədər gücləndirmişik, o qədər güclü təməl üzərində
qurmuşuq ki, artıq bu dostluq sarsılmazdır və əbədidir. Cənab
Prezident, bir daha xüsusilə Sizin rolunuzu qeyd etmək istərdim.
Sizin sayənizdə biz bu haqda danışa bilirik və əminəm ki, gələcək
nəsillər də buna layiqli qiymət verəcəkdir. Mən buna şübhə
etmirəm.
Bir daha, cənab Prezident, Sizə və Azərbaycan xalqına təşəkkür
edirəm. Diqqətinizə görə çox sağ olun.
---------
19:53
AzərTAc xəbər verir ki, fevralın 27-də təkbətək görüş başa
çatdıqdan sonra Azərbaycan Respublikasının Prezidentiİlham Əliyevin və Gürcüstan PrezidentiMixeil Saakaşvilinin nümayəndə heyətlərinin iştirakı
ilə geniş tərkibdə görüşü olmuşdur.
Azərbaycan Prezidentiİlham Əliyevgörüş
iştirakçılarını salamlayaraq dedi:
- Hörmətli cənab Prezident!
Hörmətli qonaqlar!
Sizi Azərbaycanda görməyə şadam. Xoş gəlmisiniz! Biz indicə
ikitərəfli münasibətlərin mühüm məsələləri və regional problemlər
barədə fikir mübadiləsi apardıq. İndi müzakirələrimizi geniş
tərkibdə davam etdirəcəyik.
Əvvələn, demək istəyirəm ki, Sizi ölkəmizdə yenidən görməyə çox
şadam. Sizin Azərbaycana rəsmi səfəriniz münasibətlərimizin
inkişafında çox mühüm mərhələdir. Son doqquz ildə biz Bakıda,
Tbilisidə, Batumidə və başqa şəhərlərdə tez-tez görüşmüşük.
Şadam ki, bu əlaqələrimiz davam edir və bizim münasibətlərin indiki
mərhələsində Gürcüstan ilə Azərbaycan arasında strateji
tərəfdaşlığın tam varisliyini təmin etmək zəruridir. Şadam ki, Siz
səfərə bu cür nüfuzlu nümayəndə heyəti ilə gəlmisiniz. Onların
əksəriyyətini çoxdan tanıyıram. Əminəm ki, sizin Bakıda olmağınız
həmkarlar arasında əlaqələr baxımından da faydalı olacaqdır.
Bizim münasibətlər çox sınaqlardan keçmiş, ən yüksək səviyyəyə
çatmışdır, bundan yüksəyini təsəvvür etmək yəqin ki, çətindir.
Konkret layihələr həyata keçirilir, onlar ölkələrimizi və
xalqlarımızı daha da yaxınlaşdırır. Gələcək üçün də yaxşı
perspektivlər vardır.
Bunu təmin etmək üçün inamlı inteqrasiya kursunu, beynəlxalq sahədə
səylərimizin əlaqələndirilməsini davam etdirmək lazımdır. Sizinlə
başladığımız konkret iqtisadi və infrastruktur layihələrinin uğurla
başa çatdırılması da regionda sabitliyə və xalqlarımızın rifahına
şərait yaradacaqdır.
Gündəliyimiz həmişəki kimi, çox genişdir. Bizim gündəlikdə müxtəlif
xarakterli çoxlu məsələlər vardır. Vacibdir ki, onların hamısı
müsbət və səmərəli həll edilir. Güman edirəm ki, Sizin budəfəki
səfərinizin yekunlarına əsasən, biz əməkdaşlığın daha da
möhkəmləndirilməsinin konkret yollarını da müəyyən edəcəyik.
Bir daha xoş gəlmisiniz.
X X X
Azərbaycana yenidən gəlişindən və Prezidentİlham
Əliyevilə görüşündən məmnunluq duyduğunu bildirən Gürcüstan
PrezidentiMixeil Saakaşvilidedi:
- Çox sağ olun, cənab Prezident! Əvvələn, bizim üçün doğma olan
Bakıya gəlmək, əlbəttə, böyük şərəf və həmişə sevindiricidir.
Həqiqətən, Bakı regionun ən mühüm mərkəzi olmaqla bərabər, həm də
dünyanın ən məftunedici və maraqlı şəhərlərindən biridir. Mən ilk
dəfə prezidentlik müddətimin başlanğıcında Sizin andiçmə mərasiminə
gəlişimdən sonra Bakının necə tərəqqi etdiyini gördüm. O vaxt Bakı
yenicə inkişaf etməyə başlayırdı. Mən dünyada Azərbaycan kimi
sürətlə inkişaf edən başqa ölkə tanımıram, ola bilsin ki, bir-iki
daha zəngin və daha böyük ölkə vardır. Zənnimcə, bu, həm Sizin, həm
də xalqınızın xidmətidir.
Bizim münasibətlərimiz də inkişaf edir. Bu münasibətlərin təməli
ulu öndər Heydər Əliyevin uzaqgörən strateji siyasəti nəticəsində
qoyulmuşdur. O, Azərbaycanın hansı istiqamətdə irəliləməli olması
barədə tam qəti kurs müəyyən etmişdir. Məhz bu qətiyyət, strateji
uzaqgörənlik, bütün bu tədbirlərin həyata keçirilməsində dəqiq
ardıcıllıq Sizin siyasətinizdə də davam etmiş və Azərbaycanı
bugünkü səviyyəyə çatdırmışdır. Mənim bütün həmvətənlərim və güman
edirəm ki, dünyanın, ən azı bu regionun bütün düşünən, məlumatlı
adamları Sizə heyrandır, vurğundur. Ona görə bu mənada biz bu
əməkdaşlığın nəticələrinə bir növ yekun vururuq. Şadam ki,
Gürcüstanın Baş naziri də hökumət nümayəndə heyəti ilə burada
olmuşdur. Mən başa düşürəm, Gürcüstanda hakimiyyətdə kim
olur-olsun, onlar Azərbaycanın əhəmiyyətini bilirlər, onlar
başlanmış fəaliyyət kursunu davam etdirməyə bilməzlər. Bu kurs
Gürcüstanda icra hakimiyyətinin başında kimin dayanmasından asılı
deyildir. Çünki bu, iki xalq arasındakı kursdur. Bu kursun
alternativi yoxdur. Ölkələrimiz arasında sadə vətəndaşlar, biznes,
hökumətlər, prezidentlər, baş nazirlər səviyyəsində çox dərin
strateji tərəfdaşlığın inkişaf etdirilməsindən fərqli heç bir
inkişaf variantı yoxdur. Ona görə bu mənada biz Sizə çox
minnətdarıq.
----------
17:37
AzərTAc xəbər verir ki, fevralın 27-də geniş tərkibdə
görüş başa çatdıqdan sonra Azərbaycan Prezidentiİlham Əliyevvə Gürcüstan PrezidentiMixeil Saakaşvilimətbuata bəyanatlarla çıxış
etmişlər.
---------
17:02
AzərTAc xəbər verir ki, fevralın 27-də rəsmi qarşılanma
mərasimindən sonra Azərbaycan Respublikasının
Prezidentiİlham Əliyevin və Gürcüstan
PrezidentiMixeil Saakaşvilinin təkbətək
görüşü olmuşdur.
Görüşdə Azərbaycan Respublikası ilə Gürcüstan arasında ikitərəfli
münasibətlərin müxtəlif sahələrdə uğurlu inkişafından məmnunluq
bildirildi. Ölkələrimiz arasında əlaqələrin bundan sonra da inkişaf
edəcəyinə əminlik ifadə olundu.
Görüşdə qarşılıqlı maraq doğuran məsələlər barədə fikir mübadiləsi
aparıldı.
X X X
AzərTAc xəbər verir ki, fevralın 27-də təkbətək görüş başa
çatdıqdan sonra Azərbaycan Respublikasının Prezidentiİlham Əliyevin və Gürcüstan PrezidentiMixeil Saakaşvilinin nümayəndə heyətlərinin iştirakı
ilə geniş tərkibdə görüşü olmuşdur.
---------
16:05
Fevralın 27-də Azərbaycan Respublikasına rəsmi səfərə gələn
Gürcüstan PrezidentiMixeilSaakaşvilinin rəsmi qarşılanma mərasimi olub.
Hər iki ölkənin dövlət bayraqlarının dalğalandığı meydanda ali
qonağın şərəfinə fəxri qarovul dəstəsi düzülmüşdü.
Fəxri qarovul dəstəsinin rəisi Prezidentİlham
Əliyevə raport verdi.
Azərbaycan Respublikasının Prezidenti İlham Əliyev və
xanımıMehriban ƏliyevaGürcüstan Prezidenti
Mixeil Saakaşvili və xanımıSandra Elizabet
Rulofsu qarşıladılar.
Fəxri qarovul dəstəsinin rəisi Gürcüstan Prezidentinə raport
verdi.
Gürcüstanın və Azərbaycan Respublikasının dövlət himnləri
səsləndi.
Dövlət başçıları fəxri qarovul dəstəsinin qarşısından keçdilər.
Gürcüstan Prezidenti Azərbaycan əsgərlərini salamladı.
Azərbaycan Respublikasının dövlət və hökumət nümayəndələri
Prezident Mixeil Saakaşviliyə, Gürcüstanın nümayəndə heyətinin
üzvləri Prezident İlham Əliyevə təqdim olundu.
Fəxri qarovul dəstəsi hərbi marşın sədaları altında dövlət
başçılarının qarşısından keçdi.
Prezidentlər və xanımları rəsmi foto çəkdirdilər