Əmək yarmarkalarında iştirak edənlərin 60 faizi peşəsiz, təhsilsiz gənclərdir
5 Mart 2013 16:05 (UTC+04:00)
"Azərbaycanda gənclərin təhsil səviyyəsi ilə bağlı statistik
rəqəmlər, digər ölkələrlə müqayisədə aşağıdır. Təəssüfedici haldır
ki, bu gün əmək yarmarkalarında iştirak edənlərin 60 faizi peşəsiz,
təhsilsiz gənclərdir".
Bu sözləri Movqe.az-a açıqlamasında Əmək və Əhalinin Sosial
Müdafiəsi Nazirliyi (ƏƏSMN) Baş Məşğulluq İdarəsinin rəis müavini
Şahbaz Xələfov deyib. Onun sözlərinə görə,peşə təhsili alan
gənclərin sayı xüsusilə azlıq təşkil edir: Kolleclərlə birlikdə
gənclərin bu gün 20 faizi ancaq peşə təhsilınə yiyələnir. Bu rəqəm
ən azından 50 faizə yüksəlməlidir ki, gənclər əmək bazarında
özlərinə iş tapa bilsinlər. Ali təhsilli gənclərin sayı ilə bağlı
statistik vəziyyət tam arzuolunan səviyyədə olmasa da, peşə təhsili
ilə müqayisədə bir qədər yaxşıdır. Bizdə bu gün gənclərin 40-45
faizi təhsillidirsə, Rusiyada bu rəqəm 70 faizdən yuxarıdır. Ona
görə də çalışmaq lazımdır ki, gənclər arasında savadlanmanın
səviyyəsi yüksəlsin".