LAYİHƏNİN İSTİQAMƏTİ: “Regionların sosial-iqtisadi inkişafının təşviq edilməsi”
13 Mart 2013 08:00 (UTC+04:00)
Bu gün sürətli inkişaf dinamikasına görə fərqlənən regionlar
sırasında Sabirabad əldə etdiyi nailiyyətlərlə seçilənlər sırasında
yer alır. Regionların inkişafına dair müvafiq dövlət proqramları və
digər tədbirlər burada uğurla reallaşdırılır və möhtəşəm
nəticələrin əldə olunmasına gətirib çıxarır. Ötən ilin
sosial-iqtisadi yekunları da qeyd edilənlərin real təsdiqi kimi
çıxış edir. Belə ki, ötən il rayonda iqtisadiyyatın bütün
sahələrində 2011-ci illə müqayisədə nəticələr yüksəlib.
Hesabat dövründə istehsal olunan ümumi məhsulun həcmi 313 milyon
599 min manat olub. Bu da 2011-ci ilə nisbətən 10,5 faiz çoxdur.
2012-ci ildə 4 milyon 740 min manatlıq sənaye, 150 milyon 659 min
manatlıq kənd təsərrüfatı məhsulları istehsal edilib. Əhaliyə 557
min manatlıq poçt, rabitə, 36 milyon 716 min manatlıq pullu
xidmətlər göstərilib. Əsas kapitala 104 milyon 773 min manat
investisiya yönəldilib. Bu, əvvəlki illə müqayisədə 21 milyon 79
min manat çoxdur. Adambaşına düşən pul gəlirləri də əvvəlki
ildəkindən xeyli artıq olub. 2012-ci ildə rayonda 13 yeni müəssisə
yaradılıb, 553 yeni iş yeri açılıb.
Ötən il rayonda gedən abadlıq və quruculuq işləri sürətlə davam
etdirilərək şəhərin Heydər Əliyev prospektində və 20 Yanvar
küçəsində yerləşən beşmərtəbəli yaşayış binalarının fasad
hissələri, pəncərələri və dam örtükləri müasir üslubda yenidən
qurulub, prospekt boyu istinad divarları plitələrlə üzlənib. Heydər
Əliyev prospektində yerləşən 15 və 17 saylı beşmərtəbəli yaşayış
binalarının həyətində uşaqlar üçün əyləncə parkı salınıb.
Onu da qeyd edək ki, ötən ilin noyabrında Heydər Əliyevin adını
daşıyan parkda Heydər Əliyev Mərkəzinin təməlqoyma mərasimi
keçrilib. Mərkəzin tikinti sahəsi 1220 kvadratmetr, ümumi sahəsi
3600 kvadratmetrdır. Yeni binanın foyesində Ulu öndərin büstü
qoyulacaq, burada onun həyat və fəaliyyətini əks etdirən muzey, 250
yerlik konfrans zalı, elektron kitabxana, 9 müxtəlif təyinatlı
dərnəklər üçün otaqlar, o cümlədən iş və xidmət otaqları nəzərdə
tutulmuşdur. Ümumilikdə Park yenidən qurulacaqdır. Mərkəz Umummilli
lider Heydər Əliyevin anadan olmasının 90 illiyi ərəfəsində
istifadəyə veriləcək. Onu da bildirək ki, torpaq islahatının
aparılması nəticəsində rayonda 23 min 763 ailəyə 45 min 236 hektar
torpaq payı verilib. İstehsal olunan kənd təsərrüfatı məhsullarının
hamısı özəl sektorun payına düşür. Hazırda rayonda 114 kənd
təsərrüfatı və xidmət təşkilatı fəaliyyət göstərir ki, bunun da
77-si kənd təsərrüfatı müəssisəsi, 4-ü kooperativ, 73-ü özəl, 37-si
xidmət təşkilatı, 31-i fərdi sahibkardır.
Ötən il taxıl əkini sahələri və məhsul istehsalı da artıb. Hesabat
ilində 67 min 670 ton taxıl, 4.053 ton pambıq, 14 min 245 ton
kartof, 43 min 215 ton tərəvəz, 15 min 317 ton meyvə, 54 min 375
ton bostan məhsulları, 1.973 ton qarğıdalı istehsal edilib. Bütün
bu göstəricilər əvvəlki illə müqayisədə çox olub. 2012-ci ildə
heyvandarlıq inkişaf etdirilib, mal-qaranın sayında artım olub, ət,
süd, yun, yumurta istehsalında xeyli artım qeydə alınıb. Ötən il
3.413 abonentə təbii qaz verilib. Bu sırada kəndlər də xüsusi yer
alır. Ötən ilin sonlarında Sabirabad rayonunun Ulacalı kəndinə
təbii qazın verilməsini buna misal göstərmək olar.
Rayonda subasmaya məruz qalmış kəndlər, o cümlədən Ulacalı kənd
ərazi vahidliyini əhatə edən Ulacalı, Mürsəlli, Şıxlar 50 evdən
ibarət ən müasir infrastrukturu olan qəsəbə salınıb, 301 möhkəm
özüllü ev tikilib. Üç məktəb ən müasir tələblərə cavab verən
səviyyədə yenidən qurulub, iki tibb müəssisəsi tikilib, sakinlərə
ziyana görə 3,4 milyon manata yaxın kompensasiya ödənilib. Bu gün
isə kəndə təbii qaz verilir, 866 ailəyə istilik, hərarət bəxş
olunur. Bu iş cari ildə də davam etdirilir.
Ölkədə içməli su və kanalizasiya layihələrinin icrası istiqamətində
qlobal layihələr həyata keçirilir. 2012-ci ildə rayonun Xankeçən,
Poladtuğay, Bulaqlı, Qaratuğay və Şıx Salahlı kəndlərində modul
tipli sudurulducu qurğu inşa edilərək əhalinin istifadəsinə
verilib. Ümumilikdə rayonun 24 kəndində sudurulducu qurğu
quraşdırılıb. Ötən ilin iyununda isə Sabirabad şəhərinin su
təchizatı və kanalizasiya sistemlərinin yenidən qurulması
layihəsinin təməlqoyma mərasimi keçirilib. Rayonda yenidənqurma
işləri Azərbaycan Hökuməti ilə Dünya Bankı arasında imzalanmış
"Milli Su Təchizatı və Kanalizasiya Xidmətləri Layihəsi"
çərçivəsində həyata keçirilir. Azərbaycan Prezident İlham Əliyevin
təsdiqlədiyi "Regionların sosial-iqtisadi inkişafı" Dövlət
Proqramının tərkib hissəsi olan bu layihə üzrə işlərin 2014-cü ildə
başa çatdırılması, nəticədə istehlakçıların dayanıqlı və
keyfiyyətli içməli su ilə təchiz olunacağı nəzərdə tutulur.
Sabirabad şəhəri və ətraf kəndlərdə istehlakçıların keyfiyyətli və
dayanıqlı su təchizatının aparılması üçün Kür Sutəmizləyici
Qurğular Kompleksindən çəkiləcək yeni magistral kəmərlə rayona
saniyədə 118 litr su ötürüləcək. Halbuki hazırda Sabirabad
sakinlərinə içməli su Kür çayından götürülərək, qismən təmizlənib
verilir. Layihənin icrası nəticəsində sakinlər keyfiyyətli və
dayanıqlı içməli su ilə təmin olunacaq, şəhərin kanalizasiya
infrastrukturu tamamilə yenidən qurulacaq.
"Sabirabad şəhərinin su təchizatı və kanalizasiya sistemlərinin
yenidən qurulması" layihəsi Sabirabad şəhərində 34423, Qalaqayın,
Suqovuşan, Qəfərli, Əsədli, Bulaqlı, Balakənd kəndlərində isə 14352
nəfər olmaqla ümumilikdə 48775 nəfərin su təchizatı və kanalizasiya
xidmətlərinin əsaslı şəkildə yaxşılaşmasına hesablanıb.
Layihənin həyata keçirildiyi yaşayış məntəqələrində yüksəksıxlıqlı
polietilen borulardan 79,8 km uzunluğunda içməli su və 87 km
uzunluğunda kanalizasiya xətti çəkiləcək, 300-dən artıq yanğın
hidrantı quraşdırılacaq. Fasiləsiz su təchizatının aparılması üçün
tutumu 5400 kubmetr olan su anbarı inşa ediləcək. Yaranacaq çirkab
suları kənarlaşdırarkən özüaxımlı rejimi təmin etmək üçün
mikrotunel qazılacaq, məhsuldarlığı sutkada 10500 kubmetr olan
çirkab sutəmizləyici qurğu da inşa olunacaq. Azərbaycan Hökumətinin
Dünya Bankı ilə birgə maliyyələşdirdiyi layihə üzrə işlərin 2014-cü
ildə başa çatdırılması nəzərdə tutulur.
Sabirabad şəhərinin su təchizatı və kanalizasiya sistemlərinin
yenidən qurulması üzrə keçirilmiş beynəlxalq tenderin nəticələrinə
əsasən tikinti işlərini Türkiyə-Azərbaycan konsorsiumu -
"Koroğlu-Art-Akkord" həyata keçirir.
Hacıqabul-Bəhrəmtəpə-Horadiz magistral avtomobil yolunun Sabirabad
rayonunun ərazisindən keçən hissəsində yenidənqurma və əsaslı təmir
işləri davam etdirilir və cari ildə bu işlər başa çatdırılacaq.
Təhsil sahəsində də müəyyən uğurlara imza atılıb. Ötən il rayonun
ən böyük təhsil müəssisələrindən olan Nizami Gəncəvi adına 5 saylı
şəhər tam orta məktəbinin əsaslı təmir edilməsi, Eynulla Nadirov
adına 8 saylı şəhər tam orta məktəbinin, Yuxarı Axtaçı və
Nərimankənd tam orta məktəblərinin yeni binalarının tikilərək dərs
ilində şagirdlərin istifadəsinə verilməsi bu fonda xüsusi qeyd
olunmalıdır. Dövlət başçısı İlham Əliyevin, Heydər Əliyev Fondunun
prezidenti, Milli Məclisin deputatı, YUNESKO-nun və İSESKO-nun
xoşməramlı səfiri Mehriban xanım Əliyevanın təhsilə xüsusi diqqət
və qayğısının təzahürü olaraq ölkəmizin bütün bölgələrində yeni
tədris ocaqlarının tikilməsi məlum həqiqətdir və bu qayğıdan
Sabirabada da böyük töhfə düşür.
Məlumat üçün qeyd edək ki, Nizami Gəncəvi adına 5 saylı şəhər tam
orta məktəbi 1979-cu il sentyabrın 1-də istifadəyə verilib. Ulu
öndər Heydər Əliyev məktəbin açılışında iştirak edib, 16 sentyabr
1999-cu ildə 20 illik yubiley münasibətilə məktəbin kollektinə
təbrik məktubu göndərib. Bərpa-gücləndirmə və əsaslı təmir işləri
görülmüş, bütün zəruri avadanlıqlarla təchiz edilmiş məktəb 1176
şagird yerlikdir, 65 sinif otağından və 3 laboratoriyadan
ibarətdir. Məktəbə 35 kompüter dəsti verilib, süni örtüklü stadion
tikilib.
Eynulla Nadirov adına 8 saylı şəhər tam orta məktəbinin əvvəlki
binası 1962-ci ildə tikilib, 250 şagird yerlik olmuşdu. Təhsil
Nazirliyinin vəsaiti ilə inşa olunan 3 mərtəbəli yeni məktəb binası
480 şagird yerlikdir, bütün avadanlıqlarla təchiz edilib. 23 sinif
otağı və 2 laboratoriyadan ibarətdir. Məktəbə 15 kompüter dəsti
verilib. Nərimankənd tam orta məktəbinin 180 şagird yerlik əvvəlki
binası 1940-cı ildə tikilib. Təhsil Nazirliyinin vəsaiti ilə inşa
olunan 2 mərtəbəli yeni məktəb binası isə 480 şagird yerlikdir,
bütün avadanlıqlarla təchiz edilib.
Yuxarı Axtaçı kənd tam orta məktəbinin əvvəlki binası 1970-ci ildə
tikilib, 228 şagird yerlik olmuşdu. Fövqəladə Hallar Nazirliyi
tərəfindən inşa olunan 2 mərtəbəli yeni məktəb binası 250 şagird
yerlikdir. 12 sinif otağı, 2 laboratoriyadan ibarətdir. Məktəbə 9
kompüter dəsti verilib.
Yeri gəlmişkən, məktəblər yeni avadanlıqlarla təchiz edilib,
laboratoriyalar müasirləşdirilib, istilik sistemi ilə təmin olunub.
İdman zallarına bütün zəruri avadanlıqlar verilib.
Səhiyyə xidmətinin yaxşılaşdırılması ilə bağlı da ötən il rayonda
müəyyən tədbirlər həyata keçirilib. Nəqliyyat, mədəniyyət, turizm
və idman sahəsində də vəziyyət qənaətbəxşdir. Ümumiyyətlə, rayonda
əksər sahələr üzrə dinamik tərəqqi yaşanır və bu, qarşıdakı dövrdə
daha böyük uğurlara imza atılmasını şərtləndirir.
Elşən BAYRAMOV
Yazı Azərbaycan Respublikasının Prezidenti yanında
Kütləvi İnformasiya Vasitələrinin İnkişafına Dövlət Dəstəyi Fondu
tərəfindən maliyyələşdirilən "Regionların sosial-iqtisadi
inkişafının təşviq edilməsi" layihəsi çərçivəsində çap
olunub.