Paytaxtda zəlzələ gözlənilirmi?
15 Mart 2013 16:56 (UTC+04:00)
Bu gün Pirquluda 3.0 bal gücündə zəlzələnin qeydə alınması, dünən
bir gündə iki zəlzələ hadisənin baş verməsi zəlzələ ocaqlarının
aktivləşməsi ilə bağlı əhali arasında narahatçılığa səbəb olub.
Hətta əhali arasında tezliklə güclü zəlzələnin baş verəcəyi barədə
söz-söhbət də dolaşır. Azərbaycan Milli Elmlər Akademiyasının
(AMEA) Respublika Seysmoloji Xidmət Mərkəzinin (RSXM) baş direktoru
Qurban Yetirmişli isə narahatçılığa əsas olmadığını söylədi. Bu
barədə Movqe.az-a danışan Mərkəzin baş direktoru bildirdi ki, bir
neçə gün bundan əvvəl baş verən zəlzələlər seysmik zonalar üçün
xarakterik sayılır: "Şamaxı, Pirqulu zonaları seysmik ərazilərdir.
Bunlardan narahat olub əndişəyə düşmək olmaz. Bu zəlzələlərin elə
ciddi katastrativ nəticəsi ola bilməz. Burada seysmik ocaqlar
yerləşir və zəlzələ də həmin ocaqlarda baş verib".
Q.Yetirmişli paytaxt sakinlərinin də narahatçılığına əsas
olmadığını söyləyir. Onun sözlərinə görə, Abşeron yarımadası
zəlzələ olmayan ərazidir: "Burada çox nadir hallarda güclü təkanlar
olur. Bakı üçün seysmik təhlükə Xəzər dənizində olan zəlzələ
ocaqlarında gözlənilir. Bu da Bakıda 12 ballıq şkala üzrə maksimum
8 bal gücündə hiss oluna bilər".
Onun sözlərinə görə, əgər zəlzələlər vulkanlara yaxın ərazidə baş
verərsə hazırlıq gedən vulkanları aktivləşdirə bilər. O ki qaldı
son günlər zəlzələlərin baş verməsinə, baş direktorun sözlərinə
görə, bu xeyli vaxtdır, həmin ərazidə dağ suxurlarının sıxılması
prosesinin başlaması ilə əlaqədardır. Q.Yetirmişli zəlzələlərin
aktivləşməsinin hava şəraiti ilə əlaqədar olması versiyasını inkar
edir: "Planetlərin düzülüşü, maqnit sahəsinin dəyişməsi yeraltı
təkanlara müəyyən təsirlər göstərir. Amma bunun hava ilə əlaqəsi
yoxdur".
Baş direktor deyir ki, ümumiyyətlə gün ərzində Azərbaycan
ərazisində 5-8 təkan olur: "Onlardan əksəriyyəti maqnitudası lap az
olan zəlzələlərdir. Mərkəzin stansiyaları hətta 0,1 maqnitudada
olan zəlzələləri de qeydə ala bilir. Mərkəzin saytına isə adətən
maqnitudası 3 baldan yuxarı zəlzələlər haqqında məlumatlar
yerləşdirilir. Ümumiyyətlə, burada qorxulu heç nə yoxdur. Enerji
boşalması prosesi daha daha güclü zəlzələlərin olmasının qarşısını
alır. Hazırda zəlzələ fon səviyyəindədir..