Azərbaycanda əcnəbi insan alveri qurbanlarının sayı artır- - SOS
8 Aprel 2013 12:35 (UTC+04:00)
"Azərbaycanda əcnəbi fahişələrin sayı artır. Bir vaxtlar Azərbaycan
insan alveri qurbanlarının üçüncü ölkəyə aparılmasında tranzit ölkə
rolunu oynayırdısa, artıq əcnəbi fahişələr ölkə daxilində istismar
olunur. Çünki, artıq Azərbaycanda da insan alveri qurbanlarının
istismarı üçün yerlər çoxalıb".
Bu sözləri Movqe.az-a açıqlamasında "Qadın Krizis Mərkəzi"nin
rəhbəri Mətanət Əzizova söyləyib. Mərkəz rəhbəri bildirib ki, insan
alveri ilə məşğul olan insanlar ölkə vətəndaşlarından çox, xaricdən
gətirilən qadınlara üstünlük verirlər: "Buna səbəb
əcnəbi insan alveri qurbanlarının onları ələ vermək ehtimalının az
olması, istismar yerlərində onlardan rahatlıqla istifadə
olunmasıdır. Əgər insan alveri qurbanı Azərbaycan vətəndaşıdırsa,
onu istismar edən insan alverçisi daim narahatçılıq keçirir. Çünki,
onun istismar etdiyi qadının yaxınlarının onu tapmasından, bu
barədə DİN-nin İnsan Alverinə Qarşı Mübarizə İdarəsinə məlumat
verməsindən ehtiyat edirlər. Amma onların qurbanları əcnəbi
qadınlar olduqda narahatçılıq keçirmirlər. Çünki, burada həmin
qadınları tanıyan və axtaran yoxdur. Odur ki, Azərbaycanda
son illər insan alverçiləri əcnəbi qadınları fahişəliyə cəlb
etməklə pul qazanmağa daha çox üstünlük verirlər".
M. Əzizova deyir ki, bu qadınlar əsasən Azərbaycana Rusiya və
Ukraynadan gətirilir. Ekspert bildirir ki, insan alveri qurbanları
olan həmin əcnəbi qadınlar üçüncü ölkəyə aparılmadıqlarından,
onların qaçıb özlərinə sığınacaq imkanı da olmur: "Bu qadınlar
Rusiya və Ukraynadan birbaşa istismar yerlərinə gətirilirlər.
Bu zaman həmin qadınların qaçması mümkün olmur. Amma üçüncü ölkəyə
aparılarkən, insan alveri qurbanları müxtəlif yerlərdə saxlanılır.
Bir dəfə Azərbaycanda Özbəkistandan Azərbaycan-Gürcüstan-Türkiyə
marşurutu üzrə üçüncü ölkəyə aparılan insan alveri qurbanlarından
biri qaçmağa müvəffəq olmuşdu. Həmin qadın bildirmişdi ki, onları
Türkiyəyə çay fabrikində işləmək adı ilə ölkədən çıxardıblar.
Azərbaycanda isə həmin qadınlar bir qədər kənarda, diqqət çəkməyən
yerdə saxlanılıb. Bu kimi faktlar göstərir ki, üçüncü ölkəyə
aparılarkən, insan alveri qurbanlarının onları gizlin saxlanma
şəraitindən qurbana çevriləçəklərini anlayaraq qaçmaq şansları
olur. İkinci ölkəyə gətirildikdə isə, əcnəbi qadınlar birbaşa
istismar yerlərinə aparılar və orada qurbana çevrilirlər. Bu kimi
hallar Azərbaycanda artmaqdadır. İnsan alverçiləri qurbanlarının
əcnəbi olmasından istifadə edərək daha çox pul qazanmağa müvəffəq
olurlar. Rusiyalı və ukraynalı qadınlara şərq kişilərinin maraq
göstərməsi insan alverçilərinin əcməbi qurbanlarının sayını daha da
artırır".