İşçi qrupunun rəhbər müavini: "Ağır narkotik istifadəçilərinə müaliciə effekt vermir"
15 Aprel 2013 17:15 (UTC+04:00)
"Ağır narkotik maddələrdən istifadə edən narkomanların müalicə yolu
ilə normal həyata qayıtması mümkün deyil. Heroin, tiryək, həşiş
kimi narkotik maddə istifadəçiləri Narkoloji Dispanserlərdə müalicə
olunsalar belə, onları bu bəladan xilas etmək, tam olaraq normal
həyata qaytarmaq olmur. Belə narkomanların demək olar ki, çox çüzi
hissəsi "ağ ölüm"ün pəncəsindən xilas olur".
Bu sözləri Movqe.az-a açıqlamasında "Narkomanlığa və Narkotik
Vasitələrin Qanunsuz Dövriyyəsinə Qarşı Mübarizə üzrə Dövlət
Komissiyasının İşçi Qrupunun rəhbər müavini Vasif Quliyev deyib. V.
Quliyevin sözlərinə görə, müalicə olunsalar belə ağır narkotik
aludəçilərinin narkotik maddələrdən asılılığı müalicəsi ilə müsbət
nəticə vermir. Respublika Narkoloji Dispanserindən isə bildirdilər
ki, narkomaniya xroniki xəstəlik olduğundan, bu xəstəlikdən əziyyət
çəkənlər tam sağalmır: "Belə xəstələrdə remissiya müddəti olur.
Ağır narkotik maddə istifadəçilərini bu bəladan qurtarmaq həm də
həkimin zəhmətinə bağlıdır. Düzgün müalicə metodu seçdikdə belə
xəstələrdə remissiya əldə etmək olur. Elə xəstələrimiz olub ki,
müalicə ilə normal həyata dönərək həqiqi hərbi xidmət keçiblər,
təhsillərini davam etdiriblər. Amma müalicənin effekt verməsi
narkotik maddə istifadəçisinin həyat tərzindən də asılıdır. Müalicə
ilə yanaşı, narkomanın həyat tərzi də dəyişdirilməlidir ki, o
yenidən bu həyata qayıdıb xəstə olmasın".