Nərə balıqlarının qanunsuz ovu davam edir
16 Aprel 2013 16:24 (UTC+04:00)
"Bakı-Quba-Xaçmaz yolunda qanunsuz ovlanmış nərə balıqları satılır.
Qanunla nərə balığının ovlanması yasaq olsa da, bu ərazidə
brokonyerlər nəsli kəsilmək təhlükəsində olan nərə cinsli balıqları
ovlayaraq açıq-aşkar satışa çıxardırlar". Bu sözləri Movqe.az-a
açıqlamasında Azad İstehlakçılar Birliyinin sədri Eyyub Hüseynov
verib. E. Hüseynovun sözlərinə görə, artıq xeyli vaxtdır ki,
brokonyerlər tərəfindən qanunsuz nərə balıqları ovlanaraq
Bakı-Quba- Xaçmaz yolunda satılır. Amma Ekologiya və Təbii
Sərvətlər Nazirliyinin (ETSN) müvafiq qurumu tərəfindən bu qanun
pozuntusunun qarşısı alınmır.
ETSN-nin mətbuat xidmətinin rəbəri İradə İbrahimova isə nazirliyin
müvafiq qurumunun brokonyerlərə qarşı mübarizə apardığını söyləyir.
İ. İbrahimovanın sözlərinə görə, belə faktlar daxil olan kimi
aidiyyatı qurumun əməkdaşları tərəfindən lazımi tədbirlər görülür:
"Bizim 168 qaynar xətimiz fəaliyyət göstərir. Vətəndaşlar, QHT-lər
belə hallarla rastlaşdıqda dərhal həmin nömrə ilə əlaqə saxlayıb
məlumat verə bilərlər. Bu faktla bağlı da araşdırma
aparılacaq".