Daha bir xəstəliklə bağlı Dövlət Proqramı qəbul olunacaq-Eksklüziv
17 Aprel 2013 14:17 (UTC+04:00)
"Ölkədə ölüm faktlarının böyük hissəsinin ürək-damar
xəstəliklərindən baş verməsi məsələsi bizi narahat etməlidir.
Düşünürəm ki, bunun üçün kompleks profilaktik tədbirlər
aparılmalıdır. Mənim fikrimcə, ürək-damar xəstəliklərinin
qarşısının alınması, müayinə və müalicəsi üçün Dövlət Proqramı
qəbul olunmalıdır".
Bu sözləri Movqe.az-a açıqlamasında Milli Məclisin Sosial Siyasət
Komitəsinin sədr müavini, millət vəkili Musa Quliyev söyləyib. M.
Quliyevin sözlərinə görə, artıq 10-a yaxın xəstəliklə bağlı
Dövlət Proqramı qəbul olunub: "Əgər ölkə üzrə müxtəlif
xəstəliklərdən dünyasını dəyişənlərin arasında ürək-damar
xəstəliyinin böyük payı varsa, deməli bu məsələ bizi narahat
etməlidir. Ürək-damar xəstəliklərinin erkən aşkarlanması, müayinə
və müalicəsinin, profilaktik tədbirlərin aparılması üçün Dövlət
Proqramı qəbul olunmalıdır".
Qeyd edək ki, Ümumdünya Səhiyyə Təşkilatı (ÜST) Azərbaycanda ölüm
hallarının səbəblərini açıqlayıb.
ÜST-nin qeyri-infeksion xəstəliklər üzrə məsləhətçi Sevil Əsədova
"Azərbaycan 2020: gələcəyə baxış" İnkişaf Konsepsiyasında nəzərdə
tutulan qeyri-infeksion xəstəliklərə qarşı mübarizəyə dair
2013–2020-ci illəri əhatə edən Milli Strategiyanın ilkin
layihəsinin müzakirəsinə həsr olunmuş dəyirmi masa çıxışında
bildirib ki, ölkədə ölüm halları daha çox ürək-damar xəstəlikləri
ilə bağlıdır. Onun sözlərinə görə, bu xəstəlikdən ölənlərin sayı
51% təşkil edir: "Bundan əlavə, ölkəmizdə yoluxucu, qida
çatışmazlığı, analıq və perinatal xəstəliklərdən 17%, xərçəngdən
11%, digər xroniki xəstəliklərdən 10%, tənəffüs orqanlarının
xroniki xəstəlikləri və zədələnmələrdən 4%, şəkərli diabetdən isə
3% insanlar dünyasını dəyişir. 2010-2020-ci illər ərzində
qeyri-infeksion xəstəliklər ilə bağlı ölüm hallarının 15% artması
proqnozlaşdırılır"