15-17 min uşaq qeydiyyatdan kənar qalıb
23 Aprel 2013 14:24 (UTC+04:00)
Respublika Gigiyena və Epidemiologiya Mərkəzinin direktor müavini
uşaq polikilinikalarının rəhbərlərinə və sahə həkimlərinə
xəbərdarlıq edib. Movqe.az xəbər verir ki, bu gün Elmi-Tədqiqat
Pediatriya İnstitutunda Avropa İmmunlaşdırma Həftəsi çərçivəsində
keçirilən konfransda Mərkəzin direktor müavini Afaq Əliyeva hər il
15-17 minə qədər uşağın ərazi uşaq polikilinikalarına qeydiyyatdan
kənarda qaldığını söyləyib. RGEM-nin direktor müavini
bildirib ki, qeydiyyatdan kənarda qalan, siyahıya düşməyən həmin
uşaqlar peyvəndə cəlb olunmurlar. Və müəyyən problemlər
yaradırlar: "Onu da qeyd edim ki, şübhəli xəstələrin müəyyən
qismi, hardasa 50 faizi böyük yaşlı əhalidir. Hansı ki, onlar
2006-cı ildə qızılca və məxmərəyə qarşı aparılan peyvənd
kampaniyasında peyvəndlərdən kənarda qalıblar. Çalışıb müxtəlif
peyvəndlərdən, qızılca və məxmərək əleyhinə peyvəndlərdən kənarda
qalan uşaqları hökmən aşakar edib qeydiyyata salın və onları
peyvəndə cəlb edin. Həmçinin aparılan bütün peyvəndlər doğum
evlərindən başlayaraq uşaqların elektron sağlamlıq kartlarına daxil
edilməlidir".