Son dövrlər Ermənistan tərəfindən cəbhə xəttində atəşkəsin
tez-tez pozulması halları müşahidə olunur. Az qala hər gün cəbhənin
müxtəlif istiqamətlərindən atəş səsləri eşidilir. Ekspertlər isə
hesab edir ki, bu, heç də səbəbsiz deyil. Bildiyimiz kimi,
Ermənistan parlament seçkilərinə hazırlaşır. Seçkilər cari ilin
mayında baş tutmalıdır. Bu ölkədə seçkilər ərəfəsi isə vəziyyət
olduqca kəskinləşib.
Ermənistanın günü-gündən iqtisadi cəhətdən zəifləməsi, əhalinin
aclıq və səfalət içində yaşaması fonunda Serj Sarkisyan iqtidarının
nüfuzu aşağı düşməkdədir. Əvəzində isə müxalifət xal qazanır. Belə
hal isə heç bir halda Sarkisyan hakimiyyətini qane etmir. Ona görə
də özlərinin düşdüyü ağır durumdan çıxarmaq üçün hakimiyyət çalışır
ki, əhalinin diqqətini daxili problemlərdən yayındırsın. Daxili
problemlərdən yayındırmağın əsas vasitəsini də ermənilər həmişəki
kimi Azərbaycanla təmas xəttində atəşkəsin pozulmasında görürlər.
Məhz bu yolla Ermənistan hakimiyyəti vəziyyətdən çıxmağa
meyillidir. Ona görə də son zamanlar atəşkəsin pozulması hallarının
intensivləşməsi heç şübhəsiz İrəvan tərəfindən qəsdən atılan
addımdır. Söhbətləşdiyimiz ekspertlər də atəşkəsin pozulması
hallarının intensivləşməsini Ermənistan hökumətinin seçkilər
ərəfəsi xalqın diqqətini daxili problemlərdən uzaqlaşdırma amililə
əlaqələndirdilər.
Milli Məclisin Analitik-İnformasiya Şöbəsinin müdiri Aydın Ağayevin
fikrincə də təmas xəttində erməni tərəfinin provakasiyaları ilə
İrəvanın daxili-siyasi həyatı arasında əlaqə şübhəsizdir:
"Ermənistanda aktiv siyasətdə olanların böyük hissəsi Azərbaycana
qarşı işğalçılıq müharibəsində iştirak edənlərdir. Onların xeyli
hissəsi parlamentdə, həmçinin başqa dövlət strukturlarında da
təmsil olunub.
Məsələ ondadır ki, Ermənistanda mayda keçiriləcək seçkilər
ərəfəsində siyasi rəqabət getdikcə güclənir. Onlardakı indiki
hökumət koalisiyalı hökumətdir. Lakin növbəti seçkilərə hakim
partiya deyəsən təkbaşına getmək niyyətindədir. Yəni bu işğalçı
ölkənin siyasi həyatında əvvəlki illərdə müşahidə olunmayan müəyyən
özəlliklər var. Sarkisyan iqtidarından narazılıq Ermənistanda
kifayət qədərdir. Bu narazılığı neytrallaşdırmaq üçün də onların
cəbhə zonasında atəşkəsi pozmağa getməsi gözləniləndir. Amma
atəşkəsi pozmaqdan o tərəfə getməyə isə Ermənistanın imkanı yoxdur.
Daha ciddi qarşıdurmalara getsələr, Azərbaycan Silahlı Qüvvələri
həmin an onları məhv edər. Buna şübhə yoxdur. Ümumiyyətlə, seçkilər
ərəfəsi diqqəti daxildəki problemlərdən uzaqlaşdırmaq üçün xarici
məqamları qabartmaq bir siyasi oyundur. Ermənistanda isə əsas
vəziyyətin necə olacağı seçkilərdən sonra bilinəcək. Amma Sarkisyan
komandası çox iddialıdır".
Politoloq Elman Nəsirli bildirdi ki, həqiqətən də Ermənistan
rəhbərliyi seçkilər ərəfəsi əhalinin diqqətini daxili problemlərdən
yayındırmaq üçün hətta kiçik müharibə insidenti də yarada bilərlər:
"Seçkilər ərəfəsi ölkədaxili problemlərdən xalqın diqqətini
yayındırmaq üçün düşmən ölkə ilə ziddiyyətləri kəskinləşdirmək
beynəlxalq praktikada dəfələrlə sınaqdan çıxarılmış üsuldur.
Rusiyanın Böyük Britaniyada səfiri olmuş Adamişinin sözlərinə görə,
hansı dövlətin xarici siyasətində aqressivlik nümayiş olunursa,
onlar xarici siyasətdə real vəziyyətə uyğun olmayan canfəşanlıq
nümayiş etdirirsə, deməli, həmin ölkələrin daxili siyasətində ciddi
problemlər mövcuddur. Onlar daxili siyasətdəki mürəkkəb
problemlərdən diqqəti yayındırmaq üçün xarici siyasət məsələlərinə
önəm verməklə ictimai rəyi də bununla çatdırmaq istəyirlər. Hesab
edirəm ki, bu yanaşmanı Ermənistana münasibətdə tətbiq etdikdə də
eyni nəticəyə gəlmək olar. Ermənistanda iqtisadi durum
ağırlaşdığından, iqtidarla müxalifət arasındakı uçurum daha da
genişləndiyindən narazı kütlənin indiki prezident Sarkisyan
əleyhinə mövqe bildirəcəyi istisna deyil. Nəticədə də onun
hakimiyyətdən uzaqlaşdırılması məsələsi geniş vüsət alar, ölkəni
mitinq və tətillər dalğası bürüyər. Belə olan təqdirdə Ermənistan
rəhbərliyi yenidən əcinə ovuna çıxıb, diqqəti xarici vəziyyətlə
bağlı problemlərə yönəldə, xüsusən də Dağlıq Qarabağ ətrafındakı
münasibətləri daha da mürəkkəbləşdirməyə cəhd edərlər. Çünki xarici
məsələlərlə bağlı durumu kəskinləşdirməklə seçki ərəfəsi daxili
vəziyyəti də bir o qədər sabitləşdirə bilərlər. Onların yanaşmaları
məhz belədir. Bu məntiqlə də hesab edirəm ki, seçkilər
yaxınlaşdıqca Ermənistan tərəfindən cəbhə bölgəsində atəşkəs
rejiminin pozulması intensivliyi daha da artacaq. Ermənistanda
daxili vəziyyət Sarkisyan hökumətinin təsəvvür etdiyindən də
çıxılmaz hala düşərək onun hakimiyyətdən getməsi məsələsi real
məcraya yönəlsə onlar, hətta Azərbaycanla sərhəddə kiçik bir
müharibə insidenti törədə də bilərlər. Həqiqətən də son zamanlar
atəşkəs rejiminin pozulması hallarının intensivləşməsi Ermənistanda
mayda olacaq parlament seçkiləri ərəfəsi daxili siyasi vəziyyətin
gərginliyindən qaynaqlanır".
Rüfət NADİROĞLU