Sarkozi və Ollandın oxşar və fərqlilikləri
5 May 2012 14:37 (UTC+04:00)
Mövqe.Az xəbər verir ki,
bu gün Fransada Prezident seçkilərinin ikinci turundan əvvəl bütün
təbliğat-təşviqat kampaniyası rəsmi şəkildə başa çatıb.
Respublikada prezidentliyə namizədlərin təbliğatı və rəy
sorğularının aparılması qadağandır. Ən son Fransanın 20 incəsənət
xadimi vətəndaşları Nikolya Sarkoziyə səs verməyə çağırıb. Fransua
Olland isə seçkinin birinci turunda məğlub olmuş mərkəzçi Fransua
Bayrunun tərəfdarlarının dəstəyinə ümid edə bilər.
Seçkiqabağı Nikolya Sarkozi və Fransua Ollandı müqayisə edənlər
onların çox fərqli olduğunu, lakin eyni zamanda, oxşar çox
şeylərinin olduğunu bildirirlər. Onların ikisi də 58 yaşındadır,
ikisinin də 4 övladı var, ikisi də ixtisasca vəkildir, ikisinin də
gəncliyi Parisin elitar rayonunda keçib. İkisi də siyasətin
əsaslarına Syans-Po universitetində yiyələnib. Fərq yalnız ondadır
ki, Fransua Olland universiteti fərqlənmə ilə bitirib, Nikolya
Sarkozi isə ingilis dili imtahanından keçə bilmədiyi üçün oradan
qovulub.
Nikolya Sarkozinin siyasətdə müəllimi Jak Şirak olub, Fransua
Olland isə ömrü boyu Fransua Mitterana bənzəməyə çalışıb. Əvvəllər
xarici görünüşü və səsi güclü liderə uyğun gəlməyən Fransua Olland
bu məqsədlə pəhrizə oturaraq, 15 kiloqram arıqlayıb. Səsinin isə
daha inamlı olması üçün Marko Beakko adlı vokal mütəxəssisindən
dərs alıb. Nikolya Sarkozi isə, əksinə, hiperaktiv siyasətəçi hesab
edilir. Sarkozi parıldayan hər dəbdəbə predmetlərinə maraq
göstərdiyinə görə, Fransa mətbuatında "Blinq-blinq" ləqəbi
alıb.
Qeyd edək ki, Fransa prezidenti seçilmək üçün namizədlərdən biri
səslərin 50 faizini və 1 səs qazanmalıdır. Xatırladaq ki, prezident
seçkilərinin birinci turunda Fransua Olland səslərin 28,6, Nikolya
Sarkozi isə 27,1 faizini toplamışdı.
Tural QABİLOĞLU