Əliqismət Lalayev: "Cənab Prezident! Biz sizinlə güclüyük!"

20 Aprel 2020 10:28 (UTC+04:00)

Azərbaycan Dövlət Akademik Musiqili Teatrının direktoru Əməkdar incəsənət xadimi, sənətşünaslıq üzrə fəlsəfə doktoru, tanınmış rejissor Əliqismət Lalayev rəhbərlik etdiyi teatrın kollektivi adından ölkə başçısı İlham Əliyevə dünyanı sarsıdan koronavirus pandemiyasının respublikamızda geniş yayılmasının qarşısının alınması istiqamətində apardığı uzaqgörən siyasətə, əhalinin sağlamlığının qorunması naminə həyata keçirdiyi qabaqlayıcı tədbirlərə görə təşəkkürünü bildirib.
O, dövlət başçısına ünvanladığı müraciətində​ minnətdarlığını belə ifadə edib:
Möhtərəm cənab Prezident, dünyanı sarsıdan, milyonlarla insanın qorxu kabusuna çevrilən koronavirus dəhşətinin respublikamızda yayılmasının qarşısının operativ surətdə alınması istiqamətində sizin rəhbərliyinizlə aparılan təxirəsalınmaz tədbirlər ölkə əhalisinin müxtəlif təbəqələri arasında birmənalı olaraq belə qarşılanır: Azərbaycan qüdrətli dövlətdir və onun çox qüdrətli, uzaqgörən, xalqın qayğısına qalan, böyükdən kiçiyə hər kəsin sağlamlığını nəzarətdə saxlayan bir lideri var!​ Sizin bu humanistliyiniz, şəfqətiniz körpə uşaqlardan tutmuş yaşlı vətəndaşlarımıza qədər hər bir ailəni düşünməyiniz, bəlkə də, dünyanın heç bir siyasi liderində yoxdur. Hələ yaxın günlərədək parıltısı ilə göz qamaşdıran bəzi dövlətlərdə pandemiyanının ikinci- üçüncü günü qocalardan, kimsəsizlərdən üz çevirdilər, minlərlə insanı taleyin amansız imtahanı ilə baş-başa buraxdılar.
Siz isə bütün ailənizlə birlikdə xalqın yanındasınız!
Sizin bu gözlənilməz bəlaya qarşı vaxtında başladığınız səmərəli mübarizə tədbirləri barədə indi xarici ölkə mətbuatı da yazır, gənc dövlətimizi, onun rəhbərini — sevimli Prezidentimizi nümunə göstərirlər. Əlbəttə, bu— bizim üçün, sizə hər zaman arxa, dayaq olan, sizi umid, pənah yeri bilən ölkə vətəndaşları üçün qürurverici bir duyğudur. Biz buna görə sizə borcluyuq. Məqamında verdiyiniz sərəncamlar, açılan yeni xəstəxanalar, virusun qarşısının alınmasına kömək edən gigiyenik ləvazimatlar hazırlayan yeni fabrikin qısa müddətdə işə başlaması, bütün ölkə ərazisində aparılan dizenfeksiya tədbirləri, ölkədə fövqəladə vəziyyətin vaxtında elan edilməsi, onlarla digər qabaqlayıcı tədbirlərin həyata keçirilməsinə nəzarətə nail olmanız sizin zəhmətinizin bəhrəsidir! Siz bu ağır və səksəkəli günlərdə bir daha bütün bədxahlarınıza sübut etdiniz ki, Vətəni, xalqı populist çağırışlarla yox, işlə-əməllə sevərlər. Koronavirus dalğasının dünyada və Azərbaycanda yavaş-yavaş səngiməsinə baxmayaraq, gözəgörünməz düşmənlə müharibə hələ də davam edir. Bu çətin sınaqdan az itkilərlə və alnıaçıq çıxmaq üçün atdığınız bütün addımlar xalqın yaddaşına yazılır və əminəm ki, bir millət olaraq bu gün ölkəmizdə yaşayan hər bir vicdanlı insan Sizə, eləcə də ailənizə hörmət və ehtiramını ifadə etmək, minnətdarlığını bildirmək arzusundadır. Xalq-rəhbər birliyinin, dövlət-cəmiyyət yekdilliyinin təntənəsidir bu, cənab Prezidentim! İnanıram ki, bu birlik, bu yekdillik yaxın gələcəkdə Qarabağımızın azadlığına nail olacaq Ali Baş Komandanımızı da alqışlayacaq!
Sizinlə yanaşı, Birinci vitse-prezident Mehriban xanım Əliyevanın xalqa səmimi və təsirli​ çağırışları, sözün əsil mənasında, bizə yaşamaq, daha gözəl günlər haqqında düşünmək üçün bir stimul verdi. Heydər Əliyev Fondunun vitse-prezidenti Leyla xanımın təşəbbüsü ilə aztəminatlı ailələrə yardım kompaniyasına yüzlərlə insan qoşulub. Bu ağır və imtahan dolu günlər bir daha xalqımızın xeyirxahlıq, yardımlaşmaq, bölüşmək kimi milli xüsusiyyətləri unutmadığını sübut etdi.
O xalq böyükdür ki, körpəsinə mərhəmət, böyüyünə ehtiram göstərsin! Biz bunun nümunəsini millətin, ölkənin müqəddəs xeyirxahı kimi sizin simanızda gördük.
Uca Allah Sizi qorusun!
Biz birlikdə güclüyük, cənab Prezidentimiz! Xalq sizinlədir! Azərbaycan vətəndaşları bu əzmkarlığınız, bu yorulmaz mübarizə əzminiz, qayğı və diqqətiniz üçün Sizi çox sevir, ürəkdən alqışlayır, Sizə uzun ömür, can sağlığı arzulayır.
Tanrı sizi qorusun! Tanrı millətimizi, Vətənimizi qorusun!