Nicat Dağlar müalicəsini Almaniyada davam etdirəcək
13 İyul 2013 15:22 (UTC+04:00)
Leykoz xəstəliyinə düçar olan tanınmış jurnalist, teleqraf.az
saytının baş redaktoru Nicat Dağların vəziyyəti stabil ağır olaraq
qalır. Bu barədə "Yeni Müsavat"a Nicat Dağlar özü məlumat verib.
Qeyd edək ki, iki gün öncə prezident İlham Əliyev N.Dağların dövlət
tərəfindən müalicə olunması ilə bağlı göstəriş verib. O, müayinə
olunduğu Gürcüstandan ölkəyə qayıdıb. Durumu yaxşı olmadığı üçün
onun avtomobillə Bakıya qədər gətirilməsi mümkün olmayıb və
redaktor Gəncədəki qohumlarının evinə yerləşdirilib. Dünən günün
birinci yarısında Bakıdan gedən həkim briqadası onu bir daha
müayinə edib, Gürcüstandan alınan analiz cavabları ilə bir daha
tanış olunub, keçilən müalicə kursu ilə bağlı tapşırıqlar
verilib.
Paralel olaraq Nicat Dağların müalicəsi üçün təşkilati işləri görən
Prezident Administrasiyasının məsul şəxsi analiz və müayinə
cavablarını Almaniyadakı klinikalara yollayıb və onlarla danışıqlar
aparılıb. Almaniya klinikaları Nicat Dağların əməliyyatının mümkün
olduğunu bildiriblər və artıq həmkarımızın ora göndərilməsi üçün
sənədləşmə işləri aparılır. Yaxın bir həftə ərzində onun Almaniyaya
aparılacağı gözlənilir.