Nasaz avtomobillərin sahibləri cərimələnəcək
1 Avqust 2013 13:35 (UTC+04:00)
Azərbaycanda avqust ayında normadan artıq karbon,
azot qazının oksidinin mövcudluğu aşkar olunan avtomobillərin
sürücüləri 150 manat miqdarında cərimə ediləcəklər. Movqe.az-ın
məlumatına görə, bu barədə Daxili İşlər Nazirliyinin Bakı şəhər Baş
Polis İdarəsinin Dövlət Yol Polisi İdarəsinin bölmə rəisi, polis
polkovnik-leytenantı Vaqif Əsədov "Təmiz hava" aylığı ilə bağlı
keçirilən mətbuat konfransında bildirib. Qeyd edək ki, avqustun 1-dən 31-dək Daxili İşlər Nazirliyi Baş
Dövlət Yol Polisi İdarəsi Ekologiya və Təbii Sərvətlər Nazirliyi
ilə birgə respublika ərazisində "Təmiz hava" aylığı
keçiriləcək. Əsədov deyib ki, "Təmiz
hava" aylığı tədbirinin keçirilməsində əsas məqsəd atmosfer
havasının çirklənməsinə nəzarətin gücləndirilməsi və atmosfer
havasının avtomobillərin ixrac qazlarının tərkibində olan zərərli
maddələrlə çirkləndirilməsinin qarşısının
alınmasıdır. Bölmə rəisi nəqliyyat
vasitəsi sahiblərinin, sürücülərin, eləcə də avtonəqliyyat
müəssisələri rəhbərlərinə çağırış edərək bildirib ki,
istifadələrində olan avtomobillərin yanacaq sistemini tənzimləməklə
onları saz vəziyyətə gətirməli və ixrac qazlarının tərkibinin
normalara uyğunlaşdırılmasını təmin etdikdən sonra istismarına yol
verməlidirlər.