TQDK sədri: “Builki nəticələr ötən ilkindən aşağıdır”
2 Avqust 2013 17:19 (UTC+04:00)
Tələbə Qəbulu üzrə Dövlət Komissiyasının sədri Məleykə Abbaszadə
valideynlərə müraciət edib. mövqe.az-ın verdiyi xəbərə görə,
komissiya sədri bu gün keçirilən mətbuat konfransında bildirib ki,
avqustun 6-dan abituriyentlər ixtisas seçiminə başlayacaq:
"Bizim çağırışımız odan ibarətdir ki, gənclər imtahanda qaydalara
riayət etsin, gecikməsin, qaydaları pozmasınlar. Belə olan halda
onların nəticələri ləğv olunacaq. Bundan sonra vacib mərhələ,
ixtisas seçimi başlayır. İxtisas seçimi ilə bağlı məsləhətlər
yalnız hələlik III, I və IV ixtisas qruplarına verilə bilər.
Onların kifayət qədər vaxtı olub ki, qərar qəbul etsin. Bu prosedur
abituriyentin özündən asılıdır. Valideynlərə müraciət edirəm ki,
seçimi abituriyentin özünün etməyi vacibdir. Bu prosedurlarda
düzgün qərar qəbul etmək üçün abituriyentlərə kifayət qədər məlumat
vermişik . İxtisas seçimi üçün məlumat kitabçaları çap edilib
bölgələrə də göndərilib. Bu gün dən göstəriş verəcəm ki, elektron
formada da satışa çıxarılsın".
TQDK sədri ötən ilki qəbulla builkini də müqayisə edib. O bildirib
ki, imtahanların hamısı bitmədiyindən dəqiq məlumatlar yoxdur, amma
müşahidələr göstərir ki, bu il səviyyə bir az aşağıdır: "Ötən ilki
qəbul nəticələri ilə bu ilki arasında fərq var, nəticələr keçən
ilkindən aşağıdır. Dəqiq rəqəmlər imtahanlar bitəndən sonra
açıqlanacaq. Eyni zamanda bu ilki məzunların nərticələri ilə keçən
ilkilərin müqayisəsi olacaq. Müşahidəyə əsasən bu il aşağıdır".