Nazir 1-ci sinfə qəbul qaydalarında danışdı
28 Avqust 2013 14:10 (UTC+04:00)
Azərbaycan təhsil naziri Mikayıl Cabbarov I sinfə vaxtından əvvəl
qəbulun aparılması ilə bağlı bəzi məsələlərə aydınlıq gətirib.
Movqe.az xəbər veiri ki, nazir "facebook" səhifəsində ona
ünvanlanan suallara cavab verərkən bildirib ki, Avropada uşaqlar
ibtidai təhsillərinə daha erkən, hətta 5 yaşdan da əvvəl
başlayırlar: "Bunu nəzərə almaq çox mühümdür ki, onlar erkən
inkişaf təhsil proqramlarını öz yaşıdları ilə birgə həyata
keçirirlər. Başqa sözlə 4 yaşlı uşaq 4, 5 yaşlı uşaq 5 yaşlı uşaqla
birgə məktəbə hazırlaşır. Bunu biz nəzərə almalıyıq. Çünki bizim
valideynlər bir qayda olaraq, hər zaman uşaqların əqli inkişafını
nəzərə alırlar".
Nazirin sözlərinə görə, uşaqların I sinfə erkən getməsi məsələsində
yalnız əqli sağlamlıq vəziyyəti nəzərə alınmalı deyil. Burada
uşağın fiziki inkişafı da mühüm amildir: "Bunları nəzərə alaraq,
dekabrın 31-i müvafiq qaydalara əsasən, bir tarix kimi qəbul
olunub. Bu tarixdən sonra anadan olmuş uşaqlar üçün istisnaların
olmasını nəzərdə tutmuruq. Bu da anlaşılandır ki, əgər bu tarix
yanvarın 31-də olsaydı, onda bu sual fevralda anadan olan uşaqlara
şamil ediləcəkdi. Belə bir qərarın verilməsində keçirilən dərslərin
uşaqların fiziki sağlamlığına mənfi təsir göstərməməsi də nəzərə
alınır".
M.Cabbarov bildirib ki, uşaqların I sinfə qəbulu tarixlərinin
müəyyənləşdirilməsi məsələsində həm elmdə, həm təcrübədə artıq
özünü sınamış üsullara üstünlük verməlidirlər. Onun sözlərinə görə,
bu uşaqlar çox istedadlı da ola bilər. Ancaq mövcud proqramlar
onların öz həmyaşıdları ilə oxumasını nəzərdə tutur. Qeyd edək ki,
Azərbaycanın mövcud qanunvericliyinə əsasən, uşaqlar 6 yaşı tamam
olduqda I sinfə qəbul olunurlar. Ancaq dərs ilinin başlanmasına
qədər 6 yaşı tamam olmayan, xüsusi istedadı ilə seçilən uşaqlar
Təhsil Nazirliyinin müəyyən etdiyi qaydada vaxtından əvvəl məktəbə
qəbul ola bilərlər. Vaxtından əvvəl I sinfə qəbul həmin il
sentyabrın 16-dan dekabrın 31-dək 6 yaşı tamam olman xüsusi
istedadlı uşaqlara şamil edilir.