3000-dək avtomobil yoxlanılıb
30 Avqust 2013 11:07 (UTC+04:00)
"Təmiz hava" aylığı çərçivəsində müəssisələrdə 3000-dək avtomobil
yoxlanılıb". Bakı şəhər Dövlət Yol Polisi İdarəsinin bölmə
rəisi Vaqif Əsədovun Movqe.az-a verdiyi məlumata görə, paytaxtda
keçirilən "Təmiz hava" aylığı çərçivəsində ilkin mərhələdə fərdi
avtomobillər yoxlanılıb və atmosferə normadan artıq dəm qazı
buraxan avtomobil sahibləri cərimələnib. Yol polisi əməkdaşları və
Ekologiya və Təbii Sərvətlər Nazirliyinin işçiləri ilə birgə
həmçinin müxtəlif müəssisə və şirkətlərə məxsus avtoparklarda
yoxlamalar keçiriblər. Vaqif Əsədovun sözlərinə görə, bu günədək 17
müəssisədə yoxlamalar aparılıb. Nəticədə 3000-ə yaxın avtomobil
baxışdan keçirilib və onların 221-ində nöqsanlar, yük daşıyan
avtomobillərdə, avtobuslarda nasazlıq aşkarlanıb: "Qaydalara əsasən
avtomobillərdə ətraf mühitə atılan dəm qazının miqdarı 3-3,5 faizi
keçsə bu İnzibati Xətalar Məcəlləsinin 153-cü maddəsinə görə 150
manatdan 2500 manatadək cərimə deməkdir".