Ana və qızı dəm qazından öldü
20 Yanvar 2014 23:36 (UTC+04:00)
Bakıda ana və qızı dəm qazından boğularaq ölüb. Hadisə Yasamal
rayonunun Dadaş Bünyadzadə küçəsi ev 8, mənzil 19 -da baş verib.
Burda yaşayan 47 yaşlı Dürdanə Səmədova yeganə övladı olan 4 yaşlı
qızı Kübra Səmədova ilə hamama çimməyə giriblər. Səssiz qatil ana
ilə balanın həyatına elə oradaca son qoyub. Dünyasını dəyişən ana
ilə qızı hadisə zamanı evdə tək olublar. Mərhumun həyat yoldaşı
dənizdə işlədiyindən evdə olmayıb. Evdə qalanların nə telefon, nə
də qapının döyülməsinə reaksiya verməməsi qohumları təlaşlandırıb.
Hadisə yerinə Fövqəladə Hallar Nazirliyinin xilasediciləri
çağırılıb.
Xilasedicilər doqquzmərtəbəli yaşayış binasının 7-ci mərtəbəsində
yerləşən mənzilin qapısını açıblar. Mənzilə daxil olan
xilasedicilər tükürpədici hadisənin şahidi olublar. Vəfat etmiş ana
ilə qızını hamamda ölmüş vəziyyətdə aşkarlayıblar. Faktla bağlı
Yasamal rayon Prokurorluğu tərəfindən araşdırma aparılır.
Ümumilikdə isə yanvar ayı ərzində Kliniki Tibbi Mərkəzin
Toksikologiya şöbəsinə dəm qazından zəhərlənmə diaqnozu ilə 46
müraciət daxil olub.