Kompüter qarşısında necə qocalmayaq?
5 Aprel 2012 17:57 (UTC+04:00)
Alimlər boşuna demirlər ki,
hal-hazırda kompüter dövrüdür. Bu gün kompüterdən istifadə,
gündəlik həyat tərzinə çevrilib. Bir çoxumuz hər bir işimizi
kompüter vasitəsiylə görürük. Lakin unutmaq lazım deyil ki,
kompüterin fəsadlarıda olduqca böyükdür.
Bu haqda
həkim-kosmetoloq Xalidə Şeyxova məlumat verdi.
Kompüter
texnologiyalarından istifadə ancaq gözləri və onurğa sütununu
korlamır. Bundan da, əlavə göz altında qırışlara, üzün solğunluğuna
və s. səbəb olur. Bu isə bildiyimiz kimi, qadınların yaralı
yeridir.
Bunlardan
qorunmağın bir neçə yolu var. Öncə gərginlik hallarını aradan
qaldırmaq üçün, kompüter istifadəçiləri hər bir saatdan bir
işlərinə ara verməlidirlər. Bu fasilə zamanı onlar təmiz havaya
çıxıb, ən azı yeddi dəfə dərin nəfəs almalıdırlar. Daha sonra isə
biraz limon şirəsi əlavə olunmuş, su içməlidirlər.
Ən yaxşı vasitə isə
üz dərisinin suvarılmasıdır. Əgər üzünüzdə heç bir makiyaj
yoxdursa, sadəcə üzə su vurmaq kifayətdir.
İşlədiyiniz otağda
hava quru olmamalıdır. Kompüterlə sıx əlaqədə olanlar, ilin hər
fəsilində üzlərinə nəmləndirici kremlər çəkməlidirlər. Kompüterlə
iş qurtardıqdaysa üzü limon və yaxud çobanyastığı və nanə əlavə
olunmuş su ilə yumaq lazımdır.
Bu cür insanlara
üzü sabunla yumaq olduqca ziyanlıdır. Ən əsası isə, kompüterdən
istifadə edənlər bilməlidirlər ki, onlar gündəlik yemək
rasionlarında pomidor və kələm istifadə etməlidirlər. Çünki
almaniyalı alimlər, artıq bu tərəvəzlərin üz dərisini qoruduğunu
sübut ediblər.
Türkan
Nadirqızı