Yeni səyyar yayım şəbəkəsi qurula bilər
10 Fevral 2014 15:09 (UTC+04:00)
Yeni səyyar yayım şəbəkəsi qurula bilər. ANS
PRESS-in məlumatına görə, bu gün Yayım Assosasiyasının rəhbərliyi
Mətbuat Şurasının sədri Əflatun Amaşov və Kütləvi İnformasiya
Vasitələrinin İnkişafına Dövlət Dəstəyi Fondunun icraçı direktoru
Vüqar Səfərli ilə görüşüblər. Görüş zamanı Assosasiya rəhbərliyi təklif irəli sürüb. Bu
təklifə əsasən yeni qanuni, sivil və müasir səyyar yayım
şəbəkəsinin qurulması nəzərdə tutulur. Bu təşəbbüsü müsbət
qiymətləndirən Əflatun Amaşov təklifin Mətbuat Şurasının
komissiyası tərəfindən baxılacağını deyib. Qeyd edək ki, təklif paketində səyyar yayımla məşğul olanlar
üçün formaların verilməsi, işçinin tabe olduğu yayım üzrə vəsiqə
ilə təmin olunması və bu kimi yeniliklər
olacaq. Xatırladaq ki, Fəvvarələr
Meydanı təmir olunduqdan sonra burada əvvəllər alışdığımız suvenir
piştaxtalarına rast gəlinməsə də, qəzet və jurnalların satışı davam
edirdi. Sonuncu dəfə 01.06.2010-cu il tarixində ərazidə qəzet və
jurnal satışı ilə məşğul olan kiçik sahibkarlar belə problemlə
üzləşmişdilər. O zaman səbəb kimi ərazidə aparılan təmir-tikinti
işləri göstərilmişdi. Bildirilmişdi ki, ərazidə təmir getdiyindən
qəzet və jurnalları da toz basır, bu isə əhalinin sağlamlığına
ziyandır. Lakin edilən çoxsaylı şikayətlərə əsasən 24.06.2010-cu il
tarixində Bakı şəhər Ticarət Departamenti qəzet və jurnalların
satışı üçün icazəsi olan şəxslərin fəaliyyətlərini davam
etdirməsinə icazə vermişdi.