Daha bir qadın icra başçısının müavini oldu
20 Fevral 2014 09:30 (UTC+04:00)
Bakıda daha bir İcra Hakimiyyəti başçısına qadın
müavin təyin olunub. Bu dəfəki təyinat Qaradağ rayonu İcra
hakimiyyətində gerçəkləşib. Modern.az saytının xəbərinə görə, icra
başçısı Süleyman Mikayılovun müvafiq əmri ilə Təranə İsmayılova
müavin təyin edilib. Qaradağ rayon
İcra Hakimiyəti başçısının yeni müavini Təranə İsmayılova
təəssüratlatını Modern.az saytı ilə
bölüşüb: "Bu vəzifəyə təyin olunmağım
mənim üçün gözlənilməz oldu. Çalışacam ki, mənə göstərilən bu
etimadı doğruldum. Vəzifənin məsuliyyətini dərk edirəm və üzərimə
düşən işlərin öhdəsindən layiqincə gələcəyimə də inanıram. Fevral
ayının 13-dən etibarən bu vəzifəni icra
edirəm".
Təranə İsmayılova İcra Hakimiyyəti başçısının
müavini təyin olunana qədər Qaradağ rayonundakı 39 saylı
Kardiorevmatoloji Uşaq Sanatoriyasında baş həkimi vəzifəsində
çalışıb. O, həm də hakim Yeni
Azərbaycan Partiyası Qadınlar Şurasının üzvüdür.
Xatırladaq ki, Binəqədi rayon İcra
Hakimiyyətində Aygün Əliyeva, Nəsimi rayon İcra Hakimiyyətində
Gülarə Verdiyeva, Xətai rayon İcra Hakimiyyətində Jalə Abdıyeva,
Yasamal rayon İcra Hakimiyyətində Sevil Əliyeva, Nizami rayon İcra
Hakimiyyətində Gülnaz İsrafilova, Sabunçu Rayon İcra Hakimiyyətində
Arzu Məmmədova, Xəzər rayon İcra Hakimiyyətində Lalə Əhmədova,
Səbail rayon İcra Hakimiyyətində Xalidə Bayramova, Nərimanov rayonu
İcra Hakimiyyətində İradə Mahmudova, Suraxanı rayonu İcra
Hakimiyyətində Sevinc Hüseynova icra başçılarının xanım
müavinlərdir. Beləliklə, Bakının 12
rayonundan yalnız Pirallahı rayonu İcra Hakimiyyətində qadın
müavini təyin olunmayıb. Yeri
gəlmişkən, Bakı Şəhər İcra Hakimiyyətinin başçısı Hacıbala
Abutalıbov da uzun illərdir xanım müavinlə işləyir. Merin
müavinlərindən biri Fidumə Hüseynovadır.