Bakıda “Kater və yaxtalar” sərgisi keçiriləcək
3 May 2014 20:00 (UTC+04:00)
15-17 may tarixlərində Bakı Ekspo Mərkəzində Iteca
Caspian və ITE Group PLC şirkətlərinin təşkilatçılığı ilə I Xəzər
Beynəlxalq "Kater və yaxtalar" - CIBS 2014 sərgisi
keçiriləcək.
Movqe.az xəbər verir ki, CIBS 2014 peşəkarlara,
həvəskarlara və sərgi iştirakçılarına su-motor texnikası, eləcə də
aktiv istirahət üçün məhsullar təqdim edəcək. Sərgidə Azərbaycan,
Avstriya, Böyük Britaniya, Yunanıstan, Fransa, İsveç, İtaliya,
Kanada, Niderland, Rusiya, ABŞ, Türkiyə, Ukrayna, Fransa, İsveç və
Yaponiya kimi ölkələrin təmsilçiləri iştirak edəcək. 40-dan çox
şirkəti toplayacaq debüt sərgi növbəti yaxta mövsümünə hazırlaşmağa
imkan verəcək.
Cressi, Beuchat, Marintek, Mercury, Belassi və
Polaris, Saray Deniz kimi brendlərin Azərbaycanda rəsmi təmsilçisi
və tərəfdaşı olan AlfaMarine şirkəti öz stendində hidrosikllər,
katerlər, xüsusi geyim və digər məhsulları sərgiləyəcək. Bundan
əlavə, şirkətin stendində iştirakçılar hidrosikllərin və qayıqların
test-drive-na yazıla biləcəklər. Test-drive Buzovna qəsəbəsində baş
tutacaq.
Improtex Marine&Sport Facilities şirkətinin
stendində isə məşhur yapon brendi Yamahanın məhsullarının geniş
çeşidini görmək mümkün olacaq.
Baku Marine Service stendinin qonaqları yelkənli
dəniz gəmilərinin təmiri, hərbi-dəniz mühəndisliyi, inspeksiya
fəaliyyəti ilə tanış ola biləcəklər. Beləliklə, CIBS sərgisi yaxta
biznesinin liderləri ilə tanış olmaq üçün əla
imkandır.