Yeni qulaqcıq nəbz və təzyiqi ölçəcək

4 May 2014 14:00 (UTC+04:00)
"Apple" şirkətinin istehsalı olan qulaqcıqda nəbz və təzyiqin ölçülməsi üçün sensorlar quraşdırılacaq. Movqe.az xəbər verir ki , bu barədə "Secret" servisi məlumat verib.

Qulaqcıqda, həmçinin qurğunun itirilməsi zamanı istifadəçiyə onu tapmaqda kömək edəcək "iBeacon" ötürücüsü yer alacaq. Nəbz və təzyiqlə bağlı məlumatlar şifrlənmiş şəkildə saxlanılsa da, istifadəçi onları öz həkiminə göndərmək imkanına malik olacaq.

Satışa iOS 8 mobil əməliyyat sistemi ilə eyni vaxtda çıxarılacaq qulaqcıqlar "Apple"ın 2014-cü ilin üçüncü rübündə buraxmağı planlaşdırdığı "iWatch fitnes"-qolbağının sələfi olacaq.

Secret servisinin məlumatı şirkətin 2014-cü ilin fevralında qeydiyyatdan keçirdiyi patenti bir daha təsdiq edir. Patentdə söhbət temperatur, nəbz və tər səviyyəsini ölçən biometrik qulaqcıqlardan gedir.

Qeyd edək ki, Secret anonim bəyanatlar sosial şəbəkəsi 2014-cü ilin əvvəlində istifadəyə verilib və Silikon vadisi şirkətləri haqqında şayiələrin yayılması üçün kanal kimi aktiv şəkildə istifadə olunur.